ខេត្តមណ្ឌលគិរី៖ ដើម្បីរួមចំណែកលើកកម្ពស់គុណភាពជីវិត និងសុខុមាលភាពរបស់ប្រជាពលរដ្ឋនៅតាមមូលដ្ឋាន នាព្រឹកថ្ងៃអង្គារ ទី២៨ ខែកក្កដា ឆ្នាំ២០២៦ នេះ លោក សី ទូច អភិបាល នៃគណៈអភិបាលស្រុកកោះញែក បានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវ «បណ្ដាញចែកចាយទឹកស្អាតសហគមន៍រយ៉» ដែលស្ថិតនៅក្នុងភូមិរយ៉ ឃុំរយ៉ ស្រុកកោះញែក ខេត្តមណ្ឌលគិរី។
សមិទ្ធផលបណ្ដាញទឹកស្អាតថ្មីនេះ គឺជាអំណោយដ៏ថ្លៃថ្លារបស់ អង្គការជីវិតនិងធម្មជាតិកម្ពស់ (NatureLife Cambodia) ដែលបានខិតខំកសាងឡើងក្នុងគោលបំណងឆ្លើយតបទៅនឹងតម្រូវការចាំបាច់របស់ប្រជាសហគមន៍ ក្នុងការទទួលបានទឹកស្អាតប្រើប្រាស់ប្រកបដោយអនាម័យ សុវត្ថិភាព និងគ្រប់គ្រាន់។
នៅក្នុងឱកាសនោះ លោក សី ទូច អភិបាលស្រុក បានថ្លែងអំណរគុណយ៉ាងជ្រាលជ្រៅចំពោះអង្គការ NatureLife ដែលបានយកចិត្តទុកដាក់ និងជួយជ្រោមជ្រែងដល់ការអភិវឌ្ឍហេដ្ឋារចនាសម្ព័ន្ធក្នុងមូលដ្ឋានស្រុកកោះញែក។ លោកអភិបាលស្រុកក៏បានអំពាវនាវដល់បងប្អូនប្រជាពលរដ្ឋក្នុងសហគមន៍រយ៉ ទាំងអស់ មេត្តាជួយថែរក្សាសមិទ្ធផលបណ្ដាញទឹកស្អាតនេះឱ្យបានគង់វង្ស និងប្រើប្រាស់ឱ្យចំគោលដៅ ដើម្បីជាប្រយោជន៍រយៈពេលវែងសម្រាប់កូនចៅរហូតដល់ជំនាន់ក្រោយៗទៀត។
ពិធីសម្ពោធនេះបានបញ្ចប់ទៅក្រោមបរិយាកាសរីករាយ និងស្និទ្ធស្នាលបំផុត ដោយទទួលបានការកោតសរសើរ និងក្តីរំភើបយ៉ាងក្រៃលែងពីសំណាក់ប្រជាពលរដ្ឋក្នុងភូមិរយ៉ ដែលទទួលបានប្រភពទឹកស្អាតប្រើប្រាស់ក្នុងជីវភាពប្រចាំថ្ងៃចាប់ពីពេលនេះតទៅ៕
