ខេត្តមណ្ឌលគីរី៖ ករណីបែកធ្លាយឯកសារផ្លូវការមួយដែលចុះហត្ថលេខាដោយលោក ថង សាវុន អតីតអភិបាលខេត្តមណ្ឌលគិរី កាលពីថ្ងៃទី២៦ ខែឧសភា ឆ្នាំ២០២៦ កំពុងបង្កើតឱ្យមានការដេញដោល និងមតិសង្ស័យយ៉ាងខ្លាំងពីសាធារណជន។ ការដេញដោលនេះកើតឡើងបន្ទាប់ពីគេរកឃើញថា ព្រះរាជក្រឹត្យស្ដីពីការបញ្ចប់តំណែងរបស់លោក និងការតែងតាំងអភិបាលខេត្តថ្មី ត្រូវបានឡាយព្រះហស្តលេខារួចរាល់តាំងពីថ្ងៃទី២៣ ខែឧសភា ឆ្នាំ២០២៦ ម្ល៉េះ។
ព្រឹត្តិការណ៍នេះបានចោទជាការសង្ស័យ និងសំណួរផ្លូវច្បាប់ជាច្រើនក្នុងចំណោមប្រជាពលរដ្ឋថា «តើការចុះហត្ថលេខាលើឯកសាររដ្ឋបាល បន្ទាប់ពីមានព្រះរាជក្រឹត្យចូលជាធរមាន ប៉ុន្តែមុនពិធីប្រគល់-ទទួលតំណែងផ្លូវការ ស្របច្បាប់ ឬខុសច្បាប់?»
ឯកសារដែលបែកធ្លាយតាមរយៈលោក អ៊ុក ភ័ក្ត្រា អភិបាលរងខេត្តមណ្ឌលគិរី ពាក់ព័ន្ធនឹងសម្រេចលើអាជីវកម្មរុករករ៉ែជាមួយក្រុមហ៊ុន សេងឌី ឡុង ដែលករណីនេះត្រូវបានគេមើលឃើញថា អាចមានទំនាក់ទំនងផលប្រយោជន៍រវាងភាគីទាំងបី។
ដើម្បីឆ្លើយតបទៅនឹងមតិមហាជន និងបកស្រាយភាពស្រពិចស្រពិលលើដែនសមត្ថកិច្ចផ្លូវច្បាប់ សាធារណជនបានស្នើសុំឱ្យ ក្រសួងមហាផ្ទៃ និង រដ្ឋបាលខេត្តមណ្ឌលគិរី ជួយធ្វើការបកស្រាយ និងរៀបចំការស៊ើបអង្កេតលើចំណុចគន្លឹះចំនួន ៣ ដូចខាងក្រោម៖
កាលបរិច្ឆេទបញ្ចប់សមត្ថកិច្ច៖ តើលោក ថង សាវុន បញ្ចប់សិទ្ធិ និងភារកិច្ចជាអភិបាលខេត្តមណ្ឌលគិរីជាផ្លូវការចាប់ពីថ្ងៃណា (ថ្ងៃចេញព្រះរាជក្រឹត្យ ឬថ្ងៃផ្ទេរតំណែង)?
កាលបរិច្ឆេទផ្ទេរ-ទទួលតំណែង៖ តើពិធីប្រគល់ និងទទួលតំណែងផ្លូវការរវាងលោក ថង សាវុន និងលោក គង់ គឹមនី អភិបាលខេត្តថ្មី ត្រូវបានធ្វើឡើងនៅថ្ងៃណា?
សុពលភាពច្បាប់នៃហត្ថលេខា៖ គិតត្រឹមថ្ងៃទី២៦ ខែឧសភា តើលោក ថង សាវុន នៅមានសមត្ថកិច្ចតាមផ្លូវច្បាប់ក្នុងការចុះហត្ថលេខាលើសេចក្តីសម្រេចពាក់ព័ន្ធនឹងការអនុញ្ញាតរុករករ៉ែដែរឬទេ?
មហាជន និងអ្នកតាមដានផ្លូវច្បាប់បានលើកឡើងថា ប្រសិនបើការបកស្រាយផ្លូវការបញ្ជាក់ថា សិទ្ធិ និងអំណាចផ្លូវច្បាប់របស់លោក ថង សាវុន ត្រូវបញ្ចប់ត្រឹមថ្ងៃទី២៣ ខែឧសភា (ថ្ងៃចេញព្រះរាជក្រឹត្យ) នោះរាល់លិខិត ឬសេចក្តីសម្រេចទាំងឡាយដែលបានចុះហត្ថលេខានៅថ្ងៃទី២៦ ខែឧសភា នឹងត្រូវចាត់ទុកជា មោឃៈ (គ្មានសុពលភាពផ្លូវច្បាប់) ហើយអាចឈានទៅដល់ការពិនិត្យទំនួលខុសត្រូវផ្នែករដ្ឋបាល និងផ្លូវច្បាប់បន្ថែមទៀត។
សាធារណជនរំពឹងថា ក្រសួងមហាផ្ទៃនឹងមានវិធានការស៊ើបអង្កេតដោយតម្លាភាព ដើម្បីបង្ហាញការពិតជូនប្រជាពលរដ្ឋ និងរក្សាសក្ដានុពលនៃនីតិរដ្ឋក្នុងស្ថាប័នរដ្ឋ៕
