កំពង់ចាម៖ ប្រធានក្រុមការងារចុះជួយឃុំអារក្សត្នោត និងឃុំទួលសំបួរ លោក ហេង វុទ្ធី និងលោកស្រី ឈាង ស្រីនាថ ព្រមទាំងសហការី នៅព្រឹកថ្ងៃអាទិត្យ ទី១៩ ខែកក្កដា ឆ្នាំ២០២៦ នេះ បាននាំយកទៀនវស្សា និងទេយ្យវត្ថុមួយចំនួន ទៅប្រគេនព្រះសង្ឃដែលគង់ចាំវស្សានៅវត្តគីរីចារាម (ហៅវត្តភ្នំចារ) ស្ថិតក្នុងឃុំអារក្សត្នោត ស្រុកស្ទឹងត្រង់ ខេត្តកំពង់ចាម។
នៅក្នុងពិធីបែបសាសនានោះ លោក ហេង វុទ្ធី និងភរិយា បានប្រគេនទៀនវស្សា ស្លាដក បច្ច័យ និងទេយ្យវត្ថុដល់ព្រះសង្ឃ ព្រមទាំងបានជូនថវិកាមួយចំនួនដល់អាចារ្យ យាយជី ប្រជាការពារ និងប្រជាពលរដ្ឋដែលមានជីវភាពខ្វះខាតផងដែរ។
បន្ទាប់ពីកម្មវិធីបុណ្យ ក្រុមការងារក៏បានបន្តដំណើរទៅជួបសំណេះសំណាល និងប្រគល់ផ្ទះចំនួន ១ខ្នង ដែលបានសាងសង់រួចរាល់ជាស្ថាពរ ជូនដល់គ្រួសារប្រជាពលរដ្ឋដែលមានជីវភាពក្រីក្រមួយគ្រួសារនៅក្នុងមូលដ្ឋាន ដើម្បីជួយសម្រួលដល់ការរស់នៅប្រចាំថ្ងៃរបស់ពួកគាត់៕
