កណ្ដាល៖ យោងតាមការពិនិត្យជាក់ស្តែងនៅរសៀលថ្ងៃទី១៦ ខែកក្កដា ឆ្នាំ២០២៦ សកម្មភាពដឹកជញ្ជូនខ្សាច់ចេញពីទីតាំងស្តុកខ្សាច់មួយកន្លែង ដែលមិនមានដាក់ផ្លាកសញ្ញាសម្គាល់ ស្ថិតនៅជាប់ផ្លូវកៅស៊ូថ្មី ក្នុងភូមិកោះគរ សង្កាត់រកាខ្ពស់ ក្រុងតាខ្មៅ ខេត្តកណ្ដាល នៅតែបន្តដំណើរការ។ ទន្ទឹមនឹងនោះ ផ្ទៃផ្លូវកៅស៊ូថ្មីនៅចំណុចមុខទីតាំងខាងលើ បានបង្ហាញសញ្ញាស្រុត និងខូចខាតផ្នែកខ្លះ ដែលបង្កការព្រួយបារម្ភដល់ប្រជាពលរដ្ឋធ្វើដំណើរចំពោះអាយុកាលនៃហេដ្ឋារចនាសម្ព័ន្ធមួយនេះ។
តាមលក្ខណៈបច្ចេកទេស ផ្លូវកៅស៊ូនីមួយៗត្រូវបានសាងសង់ឡើងដោយកំណត់សមត្ថភាពទ្រទម្ងន់ជាក់លាក់។ ការចេញចូលញឹកញាប់របស់រថយន្តដឹកជញ្ជូនធុនធ្ងន់ ជាពិសេសប្រសិនបើមានការផ្ទុកលើសទម្ងន់កំណត់ ឬការហូរជ្រាបទឹក និងខ្សាច់មកលើផ្ទៃផ្លូវ អាចធ្វើឱ្យស្រទាប់គ្រឹះផ្លូវបាត់បង់គុណភាព បង្កជាស្នាមប្រេះ ឬស្រុតមុនអាយុកាលកំណត់ ដែលមិនត្រឹមតែប៉ះពាល់ដល់ថវិកាជាតិក្នុងការសាងសង់ប៉ុណ្ណោះទេ ប៉ុន្តែថែមទាំងអាចប៉ះពាល់ដល់សុវត្ថិភាពនៃការធ្វើដំណើរផងដែរ។
ជាគោលការណ៍ច្បាប់ អាជីវកម្មដេប៉ូសម្ភារៈសំណង់ និងការដឹកជញ្ជូនទាំងអស់ ត្រូវតែអនុវត្តតាមបទប្បញ្ញត្តិជាធរមាន រួមមានការរក្សាបរិស្ថាន សណ្ដាប់ធ្នាប់ វិធានការការពារផ្លូវថ្នល់ និងការគោរពទម្ងន់ផ្ទុក។ ក្នុងករណីមានការខូចខាតហេដ្ឋារចនាសម្ព័ន្ធសាធារណៈដែលបណ្តាលមកពីសកម្មភាពអាជីវកម្ម ភាគីពាក់ព័ន្ធត្រូវទទួលខុសត្រូវតាមនីតិវិធី បន្ទាប់ពីមានការត្រួតពិនិត្យ និងវាយតម្លៃជាផ្លូវការពីស្ថាប័នជំនាញ។
ដើម្បីការពារទ្រព្យសម្បត្តិសាធារណៈ និងជៀសវាងការចំណាយថវិការដ្ឋក្នុងការជួសជុលឡើងវិញ ប្រជាពលរដ្ឋនៅក្នុងមូលដ្ឋានបានសំណូមពរ និងរំពឹងថា អាជ្ញាធរសង្កាត់រកាខ្ពស់ គណៈអភិបាលក្រុងតាខ្មៅ មន្ទីរសាធារណការ និងដឹកជញ្ជូនខេត្ត ព្រមទាំងមន្ទីររ៉ែ និងថាមពលខេត្តកណ្ដាល នឹងចុះពិនិត្យស្ថានភាពជាក់ស្តែងនៅទីតាំងខាងលើ។ ការចុះផ្ទៀងផ្ទាត់លើការគោរពលក្ខខណ្ឌបច្ចេកទេស អាជ្ញាបណ្ណ និងការអនុវត្តច្បាប់របស់អាជីវកម្ម នឹងជួយធានាបាននូវតម្លាភាព ភាពស្មើគ្នាចំពោះមុខច្បាប់ និងការការពារផលប្រយោជន៍រួមរបស់ប្រជាពលរដ្ឋនៅក្នុងមូលដ្ឋានប្រកបដោយចីរភាព៕
