ខេត្តតាកែវ៖ លោក អ៊ំ ចំរើន អភិបាលនៃគណៈអភិបាលស្រុកទ្រាំង បានបន្តជំរុញយុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៦ ដោយបានអំពាវនាវដល់មន្ត្រីរាជការ កងកម្លាំងប្រដាប់អាវុធ លោកគ្រូ អ្នកគ្រូ អាជីវករ សប្បុរសជន និងប្រជាពលរដ្ឋគ្រប់មជ្ឈដ្ឋាន ចូលរួមបរិច្ចាគថវិកាទៅកាន់មូលនិធិគន្ធបុប្ផាកម្ពុជា ដើម្បីរួមចំណែកទ្រទ្រង់ការផ្តល់សេវាព្យាបាល និងសង្គ្រោះជីវិតកុមារកម្ពុជាដោយឥតគិតថ្លៃ។
លោកអភិបាលស្រុកបញ្ជាក់ថា យុទ្ធនាការនេះ ត្រូវបានរៀបចំឡើងក្នុងគោលបំណងលើកកម្ពស់ស្មារតីចែករំលែក និងការទទួលខុសត្រូវរួមរបស់សង្គម ក្នុងការជួយដល់កុមារកម្ពុជា ដែលជាធនធានមនុស្សដ៏មានតម្លៃ និងជាសសរស្តម្ភសម្រាប់ការអភិវឌ្ឍប្រទេសជាតិនាពេលអនាគត។ ទោះបីជាការបរិច្ចាគត្រឹមតែ ១ម៉ឺនរៀលពីមនុស្សម្នាក់ក៏ដោយ ប៉ុន្តែប្រសិនបើមានការចូលរួមពីមនុស្សរាប់ម៉ឺននាក់ នោះនឹងក្លាយជាកម្លាំងដ៏ធំមួយក្នុងការជួយទ្រទ្រង់ដល់ដំណើរការរបស់មន្ទីរពេទ្យគន្ធបុប្ផា។ លោកបន្ថែមថា
មន្ទីរពេទ្យគន្ធបុប្ផា គឺជាស្ថាប័នសុខាភិបាលដ៏សំខាន់មួយ ដែលបានផ្តល់ការព្យាបាល និងសង្គ្រោះជីវិតកុមារកម្ពុជារាប់លាននាក់ក្នុងរយៈពេលជាច្រើនទសវត្សរ៍កន្លងមក ដោយមិនប្រកាន់ស្ថានភាពជីវភាពរបស់គ្រួសារ។ ក្រោមបេសកកម្មមនុស្សធម៌ដ៏ថ្លៃថ្លានេះ មន្ទីរពេទ្យបានក្លាយជាក្តីសង្ឃឹម និងជាទីពឹងដ៏សំខាន់សម្រាប់ឪពុកម្តាយដែលមានកូនឈឺនៅទូទាំងប្រទេស។
លោក អ៊ំ ចំរើន បានគូសបញ្ជាក់ថា ការចូលរួមបរិច្ចាគទៅកាន់មូលនិធិគន្ធបុប្ផាកម្ពុជា មិនត្រឹមតែជាការជួយសង្គ្រោះជីវិតកុមារម្នាក់ប៉ុណ្ណោះទេ ប៉ុន្តែថែមទាំងជាការជួយស្តារក្តីសង្ឃឹម និងស្នាមញញឹមជូនដល់ឪពុកម្តាយ និងក្រុមគ្រួសាររបស់ពួកគេផងដែរ។ លើសពីនេះ វាក៏ជាការវិនិយោគដ៏មានតម្លៃលើវិស័យសុខាភិបាល និងការកសាងធនធានមនុស្ស ដែលជាមូលដ្ឋានគ្រឹះសម្រាប់ការអភិវឌ្ឍប្រទេសជាតិប្រកបដោយចីរភាព។
តាមរយៈយុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៦ រដ្ឋបាលស្រុកទ្រាំង សង្ឃឹមថានឹងទទួលបានការចូលរួមគាំទ្រយ៉ាងផុលផុសពីគ្រប់មជ្ឈដ្ឋាន ដើម្បីបន្តធានានិរន្តរភាពនៃសេវាព្យាបាលកុមារដោយឥតគិតថ្លៃ និងរក្សាឱ្យបាននូវបេសកកម្មមនុស្សធម៌ដ៏ឧត្តុង្គឧត្តមរបស់មន្ទីរពេទ្យគន្ធបុប្ផា។
ជាមួយគ្នានេះ លោក ក៏បានអំពាវនាវឱ្យប្រជាពលរដ្ឋទាំងអស់ ចូលរួមបរិច្ចាគតាមលទ្ធភាពរៀងៗខ្លួន ព្រោះថវិកាមួយចំណែកតូចពីមនុស្សម្នាក់ អាចរួមបញ្ចូលគ្នាក្លាយជាកម្លាំងដ៏ធំមួយសម្រាប់ជួយសង្គ្រោះជីវិតកុមារកម្ពុជា និងបន្តរក្សាឱ្យបាននូវ «ដង្ហើមនៃក្តីសង្ឃឹម» សម្រាប់អនាគតកូនចៅជំនាន់ក្រោយ៕
