ខេត្តកណ្ដាល៖ ប្រជាពលរដ្ឋ និងអ្នកធ្វើដំណើរតាមបណ្តោយផ្លូវជាតិលេខ២១បេ បានសម្តែងការខកចិត្ត និងលើកឡើងនូវក្តីបារម្ភយ៉ាងខ្លាំង ខណៈស្ថានភាពផ្លូវនៅចំណុចមុខយឿត្រីរកាខ្ពស់ មិនដឹងជារបស់អ្នកណាសូម្បីតែអភិបាលក្រុងតាខ្មៅម្នាក់ក៏មិនស្គាល់ម្ចាស់ តែលោកបានដឹងត្រឹមថា ពីមុនជារបស់លោក វ៉ិត ធារិទ្ធិ បច្ចុប្បន្នលោកមិនដឹងថាជារបស់អ្នកណាទេ ដែលទីតាំងស្ថិតនៅភូមិព្រែកខ្សេវ សង្កាត់រកាខ្ពស់ ក្រុងតាខ្មៅ ខេត្តកណ្ដាល កំពុងរងការខូចខាតធ្ងន់ធ្ងរ ដោយមានសំបុកមាន់ជាច្រើនកន្លែង បែកភក់ ដក់ទឹក និងបញ្ចេញក្លិនស្អុយ បង្កការលំបាកដល់ការធ្វើដំណើរ និងប៉ះពាល់ដល់សុខភាពសាធារណៈ។ នេះបើតាមប្រភពដែលបណ្ដាញសារព័ត៌មានទទួលបាននៅថ្ងៃទី៥ ខែមិថុនា ឆ្នាំ២០២៦នេះ។
ប្រជាពលរដ្ឋបានលើកឡើងថា ស្ថានភាពផ្លូវដ៏អាក្រក់នេះ មិនមែនទើបតែកើតឡើងនោះទេ ប៉ុន្តែបានអូសបន្លាយជាយូរមកហើយ ដោយមិនទាន់ឃើញមានការជួសជុលឱ្យមានប្រសិទ្ធភាព ឬការចុះពិនិត្យជាក់ស្តែងពីមន្ត្រីជំនាញ និងអាជ្ញាធរពាក់ព័ន្ធនៅឡើយ។
មហាជនជាច្រើនបានរំលឹកឡើងវិញនូវប្រសាសន៍ដ៏ម៉ឺងម៉ាត់របស់ សម្តេចអគ្គមហាសេនាបតីតេជោ ហ៊ុន សែន កាលពីថ្ងៃទី៣១ ខែសីហា ឆ្នាំ២០២២ ដែលបានព្រមានដល់អភិបាលរាជធានី-ខេត្ត ក្រុង-ស្រុក និងមន្ត្រីពាក់ព័ន្ធឱ្យយកចិត្តទុកដាក់បញ្ហាផ្លូវថ្នល់ ព្រមទាំងបានសម្រេចដកអភិបាលក្រុងតាខ្មៅមួយរូបចេញពីតំណែង ដោយសារមិនបានតាមដាន និងទទួលខុសត្រូវចំពោះស្ថានភាពផ្លូវក្នុងមូលដ្ឋាន។
សម្តេចតេជោធ្លាប់បានចោទជាសំណួរថា «ហេតុអ្វីបានជាផ្លូវខូចប៉ុណ្ណឹង មើលមិនឃើញ?» ដែលជាសាររំលឹកដល់មន្ត្រីគ្រប់លំដាប់ថ្នាក់ថា តួនាទីជាអ្នកដឹកនាំ គឺត្រូវចុះមូលដ្ឋាន មើលសុខទុក្ខប្រជាពលរដ្ឋ និងដោះស្រាយបញ្ហាជាក់ស្តែង មិនមែនអង្គុយនៅការិយាល័យរង់ចាំរបាយការណ៍នោះឡើយ។
ប្រជាពលរដ្ឋបានចោទសួរថា តើស្ថានភាពផ្លូវជាតិលេខ២១បេ ដែលខូចខាតស្ទើរតែក្លាយជាអាងទឹក និងស្រែភក់នៅរដូវវស្សាបែបនេះ អាជ្ញាធរក្រុងតាខ្មៅ មន្ទីរសាធារណការ និងដឹកជញ្ជូនខេត្តកណ្ដាល ព្រមទាំងស្ថាប័នជំនាញពាក់ព័ន្ធ បានឃើញដែរឬទេ? ឬក៏កំពុងរង់ចាំឱ្យមានគ្រោះថ្នាក់ធ្ងន់ធ្ងរកើតឡើងសិន ទើបចាប់ផ្តើមអន្តរាគមន៍?
ប្រជាពលរដ្ឋសូមអំពាវនាវដល់លោក ឃឹម សំភារ អភិបាលក្រុងតាខ្មៅ លោក បូរី វង្សសានិត្យ ប្រធានមន្ទីរសាធារណការ និងដឹកជញ្ជូនខេត្តកណ្ដាល ព្រមទាំងលោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន មេត្តាចាត់ក្រុមការងារជំនាញចុះពិនិត្យ និងដោះស្រាយបញ្ហានេះឱ្យបានឆាប់រហ័ស ដើម្បីស្តារសោភ័ណភាពផ្លូវ កាត់បន្ថយហានិភ័យគ្រោះថ្នាក់ចរាចរណ៍ និងសម្រួលដល់ការរស់នៅរបស់ប្រជាពលរដ្ឋ។
ពលរដ្ឋបានបញ្ជាក់ថា ផ្លូវថ្នល់គឺជាសរសៃឈាមសេដ្ឋកិច្ច និងជាមុខមាត់នៃការអភិវឌ្ឍ។ ដូច្នេះ ការទុកឱ្យផ្លូវជាតិដ៏សំខាន់មួយខូចខាតរ៉ាំរ៉ៃ ដោយគ្មានវិធានការដោះស្រាយច្បាស់លាស់នោះ គឺជារឿងដែលពិបាកទទួលយក និងផ្ទុយទៅនឹងអនុសាសន៍ដ៏ម៉ឺងម៉ាត់របស់ថ្នាក់ដឹកនាំ ដែលតែងតែជំរុញឱ្យមន្ត្រីចុះជាប់មូលដ្ឋាន និងបម្រើប្រជាពលរដ្ឋដោយការទទួលខុសត្រូវខ្ពស់៕
