កំពង់ចាម៖ វិស័យកសិកម្ម សុខាភិបាល ការវិនិយោគ និងវិស័យសំខាន់ៗមួយចំនួនទៀត ត្រូវបានកំណត់ជាសមាសភាគជួរមុខ ដែលរដ្ឋបាលខេត្តកំពង់ចាម ត្រៀមយកទៅពិភាក្សា និងផ្លាស់ប្តូរបទពិសោធន៍ផ្ទាល់ជាមួយភាគីចិន ក្នុងដំណើរទស្សនកិច្ចផ្លូវការទៅកាន់ខេត្តហៃណាន សាធារណរដ្ឋប្រជាមានិតចិន នាដើមខែវិច្ឆិកា ឆ្នាំ២០២៦ ខាងមុខនេះ។
ការត្រៀមពង្រីកជើងមេឃនៃកិច្ចសហប្រតិបត្តិការលើវិស័យអាទិភាពទាំងនេះ ត្រូវបានលើកយកមកជជែកពិភាក្សាយ៉ាងល្អិតល្អន់ នៅក្នុងកិច្ចប្រជុំត្រួតពិនិត្យឯកសារ និងការរៀបចំលក្ខណៈបច្ចេកទេស កាលពីរសៀលថ្ងៃទី៣០ ខែតុលា ឆ្នាំ២០២៦ ដឹកនាំដោយ ឯកឧត្តម អ៊ុន ចាន់ដា អភិបាលខេត្តកំពង់ចាម នៅសាលប្រជុំតូច សាលាខេត្ត ដោយមានការចូលរួមពីប្រធានមន្ទីរ-អង្គភាព និងមន្ត្រីជំនាញពាក់ព័ន្ធ។
ដំណើរទស្សនកិច្ចផ្លូវការរយៈពេល ៥ថ្ងៃ ៤យប់ ទៅកាន់ខេត្តសម្ព័ន្ធមេត្រីភាព តាមការអញ្ជើញរបស់អភិបាលខេត្តហៃណាននាពេលខាងមុខ មិនត្រឹមតែជាជំនួបពិភាក្សាការងាររវាងថ្នាក់ដឹកនាំកំពូលនៃខេត្តទាំងពីរ និងការចុះទស្សនកិច្ចស្ថាប័នសំខាន់ៗប៉ុណ្ណោះទេ ប៉ុន្តែថែមទាំងជាឱកាសមាសក្នុងការទាញយកលទ្ធផលជាក់ស្តែង និងកៀងគរឱកាសវិនិយោគថ្មីៗ ដើម្បីយកមកជំរុញការអភិវឌ្ឍក្នុងខេត្តកំពង់ចាមផ្ទាល់។
ដើម្បីធានាថាដំណើរទស្សនកិច្ចផ្លូវការនេះទទួលបានផ្លែផ្កាខ្ពស់បំផុត និងគ្មានការរំខានដោយបញ្ហាបច្ចេកទេសណាមួយ អភិបាលខេត្តកំពង់ចាម បានតម្រូវឱ្យក្រុមការងារបច្ចេកទេស និងមន្ត្រីជំនាញពាក់ព័ន្ធទាំងអស់ ពិនិត្យមើលរាល់ការរៀបចំឯកសារ ព្រមទាំងវាយតម្លៃលើបញ្ហាប្រឈមដែលអាចកើតមានឡើងជាមុនឱ្យបានហ្មត់ចត់បំផុត មុនពេលប្រតិភូនាំមុខនៃខេត្តចាកចេញដំណើរ៕
