តាកែវ៖ ខណៈរដូវបិទការនេសាទកំពុងអនុវត្ត ដើម្បីការពារ និងអភិរក្សធនធានជលផល មហាជនកំពុងរង់ចាំតាមដានចំណាត់ការរបស់លោក កង អាណាន់ អភិបាលនៃគណៈអភិបាលស្រុកអង្គរបុរី ថាតើការដឹកនាំបង្ក្រាបបទល្មើសនេសាទក្នុងមូលដ្ឋាន នឹងអនុវត្តបានយ៉ាងមានប្រសិទ្ធភាពកម្រិតណា រហូតដល់បញ្ចប់រដូវបិទការនេសាទ។
ប្រភពពីប្រជាពលរដ្ឋក្នុងមូលដ្ឋានបានលើកឡើងថា ជារៀងរាល់ឆ្នាំ នៅក្នុងអំឡុងរដូវបិទការនេសាទ តែងមានការលួចប្រើប្រាស់ឧបករណ៍នេសាទខុសច្បាប់មួយចំនួន ដូចជារបាំងស្បៃមុង ឧបករណ៍ឆក់ត្រី និងមធ្យោបាយផ្សេងៗ ដែលអាចបង្កផលប៉ះពាល់យ៉ាងធ្ងន់ធ្ងរដល់ធនធានជលផល និងការបន្តពូជរបស់មច្ឆាជាតិ ប្រសិនបើមិនមានការទប់ស្កាត់ឱ្យបានម៉ឺងម៉ាត់។
មហាជនរំពឹងថា អាជ្ញាធរស្រុក កម្លាំងសមត្ថកិច្ច និងមន្ត្រីជំនាញជលផល នឹងសហការគ្នាចុះត្រួតពិនិត្យ និងអនុវត្តច្បាប់ដោយស្មើភាព តម្លាភាព និងគ្មានការលើកលែងចំពោះជនណាដែលប្រព្រឹត្តល្មើស។
ទន្ទឹមនឹងនេះ ក៏មានការលើកឡើងពីមតិសាធារណៈថា ការបង្ក្រាបបទល្មើសនេសាទ គួរតែមានលទ្ធផលជាក់ស្តែង និងអាចវាស់វែងបាន ដើម្បីបង្កើនទំនុកចិត្តរបស់ប្រជាពលរដ្ឋ និងការពារផលប្រយោជន៍រួមរបស់សហគមន៍។
មហាជនជាច្រើនក៏បានសម្តែងការរំពឹងថា ការអនុវត្តច្បាប់នឹងមិនក្លាយជាការចុះត្រួតពិនិត្យតែបែបរូបភាព ឬធ្វើឡើងតែមួយរយៈខ្លីនោះទេ ប៉ុន្តែត្រូវបន្តអនុវត្តយ៉ាងជាប់លាប់ រហូតដល់ចប់រដូវបិទការនេសាទ ដើម្បីធានាថាធនធានជលផលត្រូវបានការពារយ៉ាងពិតប្រាកដ។
ជុំវិញបញ្ហានេះ មហាជនកំពុងរង់ចាំមើលថា តើចំណាត់ការរបស់លោក កង អាណាន់ និងអាជ្ញាធរពាក់ព័ន្ធ នឹងបង្ហាញលទ្ធផលជាក់ស្តែងយ៉ាងណា និងអាចបង្ក្រាបបទល្មើសនេសាទឱ្យមានប្រសិទ្ធភាព ស្របតាមគោលបំណងនៃរដូវបិទការនេសាទដែរឬទេ?៕
