ចាងហ្វាងTNM ប្ដឹងលោក ចៅ កុជេង ព្រះរាជអាជ្ញារងខេត្តបាត់ដំបង ទៅក្រសួងយុត្តិធម៌ និងក្រុមប្រឹក្សាវិន័យនៃអង្គចៅក្រម!

ភ្នំពេញ៖ លោក សែម បូរ៉ា ចាងហ្វាងសារព័ត៌មាន(TNM)បានប្ដឹងលោក ចៅ កុជេង ព្រះរាជអាជ្ញារង”កម្មសិក្សា”ខេត្តបាត់ដំបង ចូលក្រសួងយុត្តិធម៌ផង និងចូលក្រុមប្រឹក្សាវិន័យ នៃឧត្ដមក្រុមប្រឹក្សានៃអង្គចៅក្រមផង.ហើយថែមទាំងប្ដឹងឧទ្ធរណ៍ ជំទាស់និងការសម្រេចរបស់លោក ចៅ កុជេង ទៀតផង..!!។

ដោយអះអាងថា លោកព្រះរាជអាជ្ញារងកម្មសិក្សារូបនេះ ប្រើឆន្ទានុសិទ្ធិ ក្នុងការអនុវត្តនីតិវិធី មានភាពមិនប្រក្រតីលើសំណុំរឿង និងមិនមានតម្លាភាព បណ្តាលឱ្យខ្លួនជាដើមបណ្ដឹង រងនូវភាពអយុត្តិធម៌ និងការខាតបង់យ៉ាងធ្ងន់ធ្ងរ ដែលមិនអាចទទួលយកបាន!!។

*នេះបើយោងតាម ពាក្យសុំអន្តរាគមន៍ ចុះថ្ងៃទី២៣ ខែកុម្ភៈ ឆ្នាំ២០២៦ និងពាក្យបណ្ដឹង ចុះថ្ងៃទី០៦ ខែមីនា ឆ្នាំ២០២៦។

លោក សែម បូរ៉ា អះអាងថា ខ្លួនបានដាក់ពាក្យបណ្ដឹង ចុះថ្ងៃទី១៩ ខែមីនា ឆ្នាំ២០២៥ ដោយបានប្ដឹងលោក ម៉ិល សុផល អភិបាលស្រុកឯកភ្នំ ខេត្តបាត់ដំបង ពីបទ“បរិហារបង្កាច់កេរ្តិ៍” ដែលប្រព្រឹត្តនៅខេត្តបាត់ដំបង កាលពីថ្ងៃទី២៨ ខែតុលា ឆ្នាំ២០២២។

លោក សែម បូរ៉ា បន្តថា ក្រោយរូបលោកចូលបំភ្លឺ និងដាក់បញ្ចូលភស្តុតាងគ្រប់គ្រាន់ហើយ!។

ស្រាប់តែលោក ចៅ កុជេង ព្រះរាជអាជ្ញារងខេត្តបាត់ដំបង ប្រើឆន្ទានុសិទ្ធិរបស់ខ្លួន ដោយសម្រេចតម្កល់រឿងទុកឥតចាត់ការ លើសំណុំរឿងព្រហ្មទណ្ឌលេខៈ ៩១១ ចុះថ្ងៃទី១១ ខែមិថុនា ឆ្នាំ២០២៥ ដែលមានលោក សែម បូរ៉ា ជាដើមបណ្ដឹង។

លោក សែម បូរ៉ា អះអាងទៀតថា ការសម្រេចតម្កល់រឿងទុកឥតចាត់ការពីសំណាក់លោក ចៅ កុជេង នៅពេលនេះ គឺមានភាពមិនប្រក្រតី ផ្ទុយពីអង្គហេតុនិងភស្តុតាងជាក់ស្ដែង! ធ្វើឲ្យប៉ះពាល់ដល់សិទ្ធិ និងផលប្រយោជន៍របស់ខ្លួនយ៉ាងធ្ងន់ធ្ងរ។

ខណៈដែលភស្តុតាង មានគ្រប់គ្រាន់សម្រាប់ដាក់បន្ទុកនិងចោទប្រកាន់ជនល្មើស..!។

ប៉ុន្តែលោក ចៅ កុជេង បែរជាមិនចោទប្រកាន់ជនល្មើស ហើយសម្រេចតម្កល់រឿងទុកឥតចាត់ការទៅវិញ!។

*ជុំវិញរឿងនេះលោក សែម បូរ៉ា បានប្រាប់”ដើមរាំង”ថា ដើមចបដំបូង កាលពីថ្ងៃទី២៥ ខែតុលា ឆ្នាំ២០២២ សារព័ត៌មានTNM របស់ខ្លួន បានចុះផ្សាយតាមសំណើរបស់ប្រជាពលរដ្ឋ ពាក់ព័ន្ធទំនាស់ដីធ្លីនៅស្រុកឯកភ្នំ..!។

មុនពេលចុះផ្សាយTNM បានធ្វើបទសម្ភាសន៍ មន្ត្រីពាក់ព័ន្ធដើម្បីឱ្យមានចម្លើយទាំងសងខាង ស្របតាមច្បាប់ស្ដីពីរបបសារព័ត៌មាន..!។

ប៉ុន្តែលោក ម៉ិល សុផល អភិបាលស្រុកឯកភ្នំ ហាក់កើតទុក្ខមិនសុខចិត្ត និងបានប្ដឹងរូបលោក ចូលតុលាការខេត្តបាត់ដំបង ដោយស្ងាត់ៗពីបទ ញុះញង់និងបរិហារកេរ្តិ៍.!។

បើតាមលោក សែម បូរ៉ា សំណុំរឿងដែលលោក ម៉ិល សុផល ប្ដឹងរូបលោកនៅពេលនោះ គឺលោកមិនដឹងខ្លួន និងមិនដែលបានទទួលដីកា កោះហៅឱ្យចូលបំភ្លឺសោះឡើយ..!!។

ផ្ទុយទៅវិញរូបលោក មានការភ្ញាក់ផ្អើល នៅពេលទទួលបាន សាលក្រមព្រហ្មទណ្ឌលេខ៩៤(ជ) ចុះថ្ងៃទី១១ ខែមករា ឆ្នាំ២០២៤ របស់សាលាដំបូងខេត្តបាត់ដំបង។

ដែលសម្រេចផ្តន្ទាទោស រូបលោក ដោយពិន័យជាប្រាក់៤.០០០.០០០(បួនលានរៀល) ចូលជាថវិការដ្ឋ ពីបទៈ បរិហាកេរ្តិ៍ជាសាធារណៈ ប្រព្រឹត្តនៅលើ បណ្តាញសង្គមហ្វេសប៊ុក កាលពីថ្ងៃទី២៥ ខែតុលា ឆ្នាំ២០២២ តាមបញ្ញត្តិមាត្រា៣០៥ នៃក្រមព្រហ្មទណ្ឌ.!។

ក្រោយរងការផ្ដន្ទាទោស ទាំងមិនដឹងខ្លួនបែបនេះ នៅថ្ងៃទី១៨ ខែមីនា ឆ្នាំ២០២៤ លោក សែម បូរ៉ា ក៏បានប្តឹងជំទាស់ នឹងការសម្រេចខាងលើ ដោយស្នើសុំឱ្យមានការសម្រេចជាថ្មី..!។

ទន្ទឹមនិងនោះ សាលាដំបូងខេត្តបាត់ដំបង បានចេញសាលក្រម លេខ ៦១៨ (ជ) ចុះថ្ងៃ ទី០៩ ខែឧសភា ឆ្នាំ២០២៤ ដោយសម្រេចតម្កល់សាលក្រមព្រហ្មទណ្ឌលេខ៩៤(ជ) ចុះថ្ងៃទី១១ ខែមករា ឆ្នាំ២០២៤ ទុកជាបានការដដែល!!។

ដោយជួបរឿងហួសចិត្តបែរនេះ នៅថ្ងៃទី០៤ ខែមិថុនា ឆ្នាំ២០២៤ លោក សែម បូរ៉ា ក៏បានប្តឹងជំទំទាស់បន្តទៅសាលាឧទ្ធរណ៍បាត់ដំបង.!!។

ក្នុងនោះ សភាព្រហ្មទណ្ឌនៃសាលាឧទ្ធរណ៍បាត់ដំបង បានលើកយកសំណុំរឿងនេះ មកជំនុំជម្រះ!។

ដោយសាលាឧទ្ធរណ៍បាត់ដំបង សម្រេចទទួលពាក្យបណ្តឹង ឧទ្ធរណ៍ចុះថ្ងៃ ទី០៤ ខែមិថុនា ឆ្នាំ២០២៤ របស់លោក សែម បូរ៉ា ទុកជាត្រឹមត្រូវតាមទម្រង់ និងគតិច្បាប់ និងបដិសេធសាលក្រម បណ្ដឹងទាស់លេខ ៦១៨ (ជ) ចុះថ្ងៃទី០៩ ខែឧសភា ឆ្នាំ២០២៤ របស់សាលាដំបូងខេត្តបាត់ដំបង”ចោលជាអសារបង់”និងបានសម្រេចឱ្យលោក សែម បូរ៉ា រួចផុតពីបទចោទប្រកាន់ពីបទៈ(បរិហារកេរ្តិ៍ជាសាធារណៈ)។

រហូតដល់ សាលដីកាសាលាឧទ្ធរណ៍បាត់ដំបង ចូលជាស្ថាពរ នៅថ្ងៃទី២៨.០៣.២០២៥ លោក សែម បូរ៉ា បានប្ដឹងលោក ម៉ិល សុផល បកវិញក្នុងបទៈ បរិហារបង្កាច់កេរ្តិ៍.តាមមាត្រា៣១១ នៃក្រមព្រហ្មទណ្ឌ ហើយក៏ត្រូវបានលោក ចៅ កុជេង ព្រះរាជអាជ្ញារង”កម្មសិក្សា”ខេត្តបាត់ដំបង សម្រេចតម្កល់រឿងទុកឥតចាត់ការ លើសំណុំរឿងព្រហ្មទណ្ឌលេខៈ ៩១១ ចុះថ្ងៃទី១១ ខែមិថុនា ឆ្នាំ២០២៥ ហើយលោក សែម បូរ៉ា ក៏បានប្ដឹងឧទ្ធរណ៍ ជំទាស់នឹងការសម្រេចនេះផងដែរ..!!។

*ជាការឆ្លើយតបលោក ប៉ង់ ចាន់សុយុទ្ធារា អ្នកនាំពាក្យអយ្យការ អមសាលាដំបូង ខេត្តបាត់ដំបង បានថ្លែងប្រាប់”ដើមរាំង”នៅរសៀលថ្ងៃទី២០.០៤.២០២៦ថា មូលដ្ឋាននិងយោង ចំពោះការសម្រេចតម្កល់រឿងទុកឥតចាត់ការ គឺមាននៅក្នុងដីកាសម្រេចនោះហើយ..!។

លោក ប៉ង់ ចាន់សុយុទ្ធារា បន្តថា ប្រសិនបើដើមបណ្ដឹង កើតទុក្ខមិនសុខចិត្តលើការសម្រេចនេះ គឺអាចប្ដឹងជំទាស់ទៅសាលាឧទ្ធរណ៍បានតាមនីតិវិធី…!។

*មេធាវីម្នាក់បានអះអាងប្រាប់”ដើមរាំង”ថា សំណុំរឿងដែលលោក សែម បូរ៉ា ប្ដឹងលោក ម៉ិល សុផល បកវិញពីបទៈបរិហារបង្កាច់កេរ្តិ៍.គឺជារឿងត្រឹមត្រូវតាមនីតិវិធីច្បាប់!!។

ព្រោះលោក ម៉ិល សុផល បានប្ដឹងលោក សែម បូរ៉ា ក្នុងបទល្មើសព្រហ្មទណ្ឌ.ហើយសាលាឧទ្ធរណ៍បាត់ដំបង បានសម្រេចទម្លាក់ បទចោទលើលោក សែម បូរ៉ា និងឱ្យលោក សែម បូរ៉ា រួចផុតពីការចោទប្រកាន់។

អញ្ចឹងស្មើនឹងលោក ម៉ិល សុផល ប្ដឹងគេទាំងគ្មានបទល្មើស ប្ដឹងបង្កាច់កេរ្តិ៍លើលោក សែម បូរ៉ា ហើយលោក សែម បូរ៉ា ប្ដឹងលោក ម៉ិល សុផល បកវិញ ពីបទៈបរិហារបង្កាច់កេរ្តិ៍ តាមមាត្រា៣១១ និង៣១២ នៃក្រមព្រហ្មទណ្ឌ គឺត្រូវតាមច្បាប់ហើយ។

មេធាវីរូបនោះអះអាងទៀតថា ការសម្រេចតម្កល់រឿងទុកឥតចាត់ការ លើសំណុំរឿងព្រហ្មទណ្ឌលេខៈ ៩១១ ចុះថ្ងៃទី១១ ខែមិថុនា ឆ្នាំ២០២៥ គឺជារឿងមិនត្រឹមត្រូវនោះទេ…!!។

ក្នុងនោះលោក សែម បូរ៉ា អាចប្ដឹងជំទាស់ទៅសាលាឧទ្ធរណ៍បាត់ដំបង បើនៅតែគ្មានចំណាត់ការទៀត អាចប្ដឹងសុំអធិបញ្ជាពីក្រសួងយុត្តិធម៌៕