តាកែវ៖ កម្លាំងនគរបាលចំនួន ១,២០០នាក់ ត្រូវបានត្រៀមរួចជាស្រេច ដើម្បីការពារសន្តិសុខ សណ្ដាប់ធ្នាប់សាធារណៈ និងសុវត្ថិភាពជូនប្រជាពលរដ្ឋ និងភ្ញៀវទេសចរ ក្នុងឱកាសព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ឆ្នាំ២០២៦ ដែលនឹងប្រព្រឹត្តទៅរយៈពេល២ថ្ងៃ នៅបឹងតាកែវ ក្រុងដូនកែវ ខេត្តតាកែវ។
ការត្រៀមកម្លាំងនេះធ្វើឡើងក្រោមការដឹកនាំរបស់លោកឧត្តមសេនីយ៍ទោ ម៉ែន លី ស្នងការនគរបាលខេត្តតាកែវ ក្នុងគោលបំណងពង្រឹងការការពារសន្តិសុខ សុវត្ថិភាព និងរក្សាសណ្ដាប់ធ្នាប់សាធារណៈឱ្យបានល្អប្រសើរ ខណៈដែលពិធីបុណ្យនេះរំពឹងថានឹងមានប្រជាពលរដ្ឋ និងភ្ញៀវទេសចរជាច្រើនចូលរួមទស្សនាកម្សាន្ត។
កម្លាំងនគរបាលនឹងចូលរួមបង្ការ និងទប់ស្កាត់បទល្មើសផ្សេងៗ សម្រួលចរាចរណ៍នៅតាមដងផ្លូវ និងតំបន់ដែលមានមនុស្សប្រមូលផ្តុំច្រើន ព្រមទាំងត្រៀមអន្តរាគមន៍ក្នុងករណីចាំបាច់ ដើម្បីធានាថា ប្រជាពលរដ្ឋអាចចូលរួមកម្សាន្តបានដោយភាពកក់ក្តៅ និងមានសុវត្ថិភាព។
ជាមួយគ្នានេះ ការសហការរវាងកម្លាំងសមត្ថកិច្ច និងអាជ្ញាធរពាក់ព័ន្ធ ត្រូវបានចាត់ទុកថាជាកត្តាសំខាន់ក្នុងការធានាឱ្យកម្មវិធីប្រណាំងទូក បណ្តែតប្រទីប និងសកម្មភាពអបអរសាទរនានា ប្រព្រឹត្តទៅដោយរលូន មានសណ្ដាប់ធ្នាប់ និងបង្កបរិយាកាសសប្បាយរីករាយជូនប្រជាពលរដ្ឋគ្រប់រូប។
សូមបញ្ជាក់ថា កម្មវិធីប្រណាំងទូក បណ្តែតប្រទីប និងសំពះព្រះខែ អកអំបុក ដើម្បីអបអរសាទរព្រះរាជពិធីបុណ្យអុំទូក ឆ្នាំ២០២៦ នៅខេត្តតាកែវ នឹងរៀបចំឡើងចាប់ពីថ្ងៃទី៣១ ខែតុលា ដល់ថ្ងៃទី១ ខែវិច្ឆិកា ឆ្នាំ២០២៦ នៅបឹងតាកែវ ស្ថិតក្នុងសង្កាត់រកាក្នុង ក្រុងដូនកែវ ខេត្តតាកែវ។
ក្នុងឱកាសនេះ ប្រជាពលរដ្ឋ និងភ្ញៀវទេសចរដែលអញ្ជើញចូលរួម ត្រូវបានលើកទឹកចិត្តឱ្យចូលរួមសហការជាមួយសមត្ថកិច្ច គោរពច្បាប់ចរាចរណ៍ ថែរក្សាសម្ភារៈផ្ទាល់ខ្លួន និងប្រុងប្រយ័ត្នចំពោះសុវត្ថិភាពកុមារ ដើម្បីឱ្យពិធីបុណ្យអុំទូកនៅខេត្តតាកែវប្រព្រឹត្តទៅប្រកបដោយភាពសប្បាយរីករាយ និងសុវត្ថិភាព៕
