ខេត្តកំពង់ចាម៖ នៅព្រឹកថ្ងៃអាទិត្យ ទី១៨ ខែតុលា ឆ្នាំ២០២៦នេះ លោក ហេង វុទ្ធី ប្រធានក្រុមការងារចុះជួយមូលដ្ឋានឃុំទួលសំបួរ និងឃុំអារក្សត្នោត ស្រុកស្ទឹងត្រង់ បានអញ្ជើញជាអធិបតីដឹកនាំកិច្ចប្រជុំបូកសរុបលទ្ធផលការងារប្រចាំខែកញ្ញា ឆ្នាំ២០២៦ និងលើកទិសដៅអនុវត្តបន្ត របស់គណបក្សប្រជាជនកម្ពុជាឃុំទួលសំបួរ។
នៅក្នុងឱកាសនោះ លោក ហេង វុទ្ធី បានទាញយករាល់សមិទ្ធផល និងលទ្ធផលការងារដែលសម្រេចបានកន្លងមក មកធ្វើជាបទពិសោធន៍សំខាន់ៗ ក្នុងគោលបំណងបន្តរុញច្រាន និងពង្រឹងគុណភាពការងារគណបក្សឱ្យកាន់តែមានភាពរឹងមាំ និងមានប្រសិទ្ធភាពខ្ពស់។
ដើម្បីតម្រង់ទិសការងារឱ្យកាន់តែចំគោលដៅ លោកប្រធានក្រុមការងារ បានដាក់ចេញនូវទិសដៅយុទ្ធសាស្ត្រសំខាន់ៗចំនួន ៦ចំណុច ជូនដល់ក្រុមការងារយកទៅអនុវត្តបន្ត រួមមាន៖
១. បន្តធ្វើបច្ចុប្បន្នភាពការគ្រប់គ្រងប្រព័ន្ធទិន្នន័យសមាជិកឱ្យបានសុក្រឹត ជាក់ច្បាស់ និងច្បាស់លាស់បំផុត។
២. បន្តចុះត្រួតពិនិត្យផ្លាកគណបក្សនៅតាមមូលដ្ឋាន ដើម្បីផ្លាស់ប្តូរថ្មី ជួសជុល ឬបំពេញបន្ថែមឱ្យបានសមរម្យ។
៣. បន្តចុះសួរសុខទុក្ខ និងពិនិត្យជីវភាពរស់នៅតាមខ្នងផ្ទះ ដោយផ្ទាល់ ដើម្បីដោះស្រាយរាល់ការលំបាករបស់ប្រជាពលរដ្ឋឱ្យបានទាន់ពេលវេលា និងឆាប់រហ័សបំផុត។
៤. បន្តចិញ្ចឹម និងបង្កើនចលនាជីវភាពគណបក្សឱ្យមានសកម្មភាពរស់រវើកជាប្រចាំ។
៥. បន្តអនុវត្តការងារតាមផែនការសកម្មភាពដែលបានកំណត់ ឱ្យសម្រេចបានលទ្ធផលល្អប្រសើរ និងមានផ្លែផ្កា។
៦. បន្តបម្រើសេវាសាធារណៈជូនប្រជាពលរដ្ឋនៅថ្នាក់មូលដ្ឋាន ដោយផ្អែកលើតម្លាភាព និងការកសាងជំនឿចិត្តខ្ពស់។
ដើម្បីជាការលើកទឹកចិត្តដល់ស្មារតីបំពេញការងារ លោក ហេង វុទ្ធី ក៏បានឧបត្ថម្ភថវិកាផ្ទាល់ខ្លួនជូនដល់ក្រុមការងារថ្នាក់មូលដ្ឋានចំនួន ២៦នាក់ ព្រមទាំងបានផ្តល់ជូននូវសម្ភារប្រើប្រាស់ និងថវិកាទ្រទ្រង់ចលនាជីវភាពគណបក្សផងដែរ។
បន្ទាប់ពីបញ្ចប់កិច្ចប្រជុំ លោក ហេង វុទ្ធី និងសហការី បានបន្តចុះផ្ទាល់តាមខ្នងផ្ទះ ដើម្បីសួរសុខទុក្ខ និងនាំយកអំណោយដ៏ថ្លៃថ្លារបស់ ឯកឧត្តម ហ៊ុន ម៉ានិត អនុប្រធានក្រុមការងារថ្នាក់ជាតិចុះជួយមូលដ្ឋានខេត្តកំពង់ចាម និងជាប្រធានក្រុមការងារចុះជួយស្រុកស្ទឹងត្រង់ ចែកជូនដល់គ្រួសារសមាជិកគណបក្សដែលមានជីវភាពខ្វះខាតចំនួន ២០គ្រួសារ នៅក្នុងឃុំទួលសំបួរ ប្រកបដោយបរិយាកាសស្និទ្ធស្នាល និងកក់ក្តៅបំផុត៕
