ខេត្តមណ្ឌលគិរី៖ ឆ្លុះបញ្ចាំងពីស្មារតីរួមសហការ និងការយកចិត្តទុកដាក់ខ្ពស់លើវិស័យអប់រំនៅតាមមូលដ្ឋាន នាព្រឹកថ្ងៃទី០១ ខែតុលា ឆ្នាំ២០២៦ នេះ លោក សី ទូច អភិបាលស្រុកកោះញែក បាននាំយកថវិកាបដិភាគចំនួន ៨០០ ដុល្លារអាមេរិក ទៅប្រគល់ជូនដល់សាលាបឋមសិក្សាម្ជូរម៉្ងា ក្នុងយុទ្ធនាការលើកកម្ពស់ហេដ្ឋារចនាសម្ព័ន្ធសិក្សាជូនដល់កុមារក្នុងសហគមន៍។
ថវិកាបដិភាគនេះទទួលបានពីការឧបត្ថម្ភ និងការរួមចំណែកយ៉ាងសកម្មពីសំណាក់ ឯកឧត្ដម គង់ គឹមនី អភិបាលនៃគណៈអភិបាលខេត្តមណ្ឌលគិរី ព្រមទាំងក្រុមការងាររាជរដ្ឋាភិបាលចុះមូលដ្ឋានស្រុកកោះញែក មន្ត្រីរាជការ និងសប្បុរសជននានា ក្រោមការចង្អុលបង្ហាញ និងយកចិត្តទុកដាក់លើសុខទុក្ខប្រជាពលរដ្ឋយ៉ាងជិតស្និទ្ធ។
លោក សី ទូច អភិបាលស្រុកកោះញែក បានគូសបញ្ជាក់ថា ថវិកាសប្បុរសធម៌ទាំងនេះ នឹងត្រូវយកទៅប្រើប្រាស់ជាថវិកាបដិភាគរួមគ្នាជាមួយអង្គការ Good Neighbours ដើម្បីអនុវត្តសកម្មភាពជួសជុល និងកែលម្អអគារសិក្សានៃសាលាបឋមសិក្សាម្ជូរម៉្ងាឱ្យមានរូបរាងថ្មី។ តាមគម្រោង ការដ្ឋានជួសជុលនេះនឹងចាប់ផ្តើមដំណើរការជាផ្លូវការនៅពាក់កណ្ដាលខែតុលា ឆ្នាំ២០២៦ ខាងមុខនេះហើយ។
សកម្មភាពនេះមិនត្រឹមតែជាការចូលរួមចំណែកផ្នែកថវិកាប៉ុណ្ណោះទេ ប៉ុន្តែគឺជាសាក្សីភាពនៃការប្ដេជ្ញាចិត្តយ៉ាងមុតមាំរវាងអាជ្ញាធរដែនដី សប្បុរសជន និងអង្គការដៃគូអភិវឌ្ឍន៍ ក្នុងការបង្កើតបរិស្ថានសិក្សាប្រកបដោយសុវត្ថិភាពខ្ពស់ សម្រាប់សិស្សានុសិស្ស សោភ័ណភាព និងភាពសមរម្យ ក្នុងការក្រេបយកចំណេះដឹង ការលើកកម្ពស់គុណភាពអប់រំ និងការអភិវឌ្ឍធនធានមនុស្សនៅកម្រិតមូលដ្ឋានឱ្យកាន់តែរឹងមាំ និងចីរភាព៕
