ខេត្តកំពង់ចាម៖ នាព្រឹកថ្ងៃទី០២ ខែកញ្ញា ឆ្នាំ២០២៦ វិទ្យាល័យព្រះសីហនុ ស្ថិតក្នុងក្រុងកំពង់ចាម ត្រូវបានជ្រើសរើសជាទីតាំងប្រកាសបិទផ្សាយលទ្ធផលប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ផ្លូវការ សម័យប្រឡង ១០ សីហា ២០២៦ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម។
យោងតាមរបាយការណ៍ផ្លូវការពីមន្ទីរអប់រំ យុវជន និងកីឡា ខេត្តកំពង់ចាម បានបង្ហាញថា បេក្ខជនប្រឡងជាប់សរុបមានចំនួន ៧,៤២៧ នាក់ ត្រូវជា ៨៥.៤២% នៃចំនួនបេក្ខជនមកប្រឡងសរុប ៨,៥១៧ នាក់។
ទិន្នន័យលម្អិតនៃបេក្ខជនប្រឡងជាប់តាមនិទ្ទេសនីមួយៗ៖
១. និទ្ទេស A៖ សរុប ១០០ នាក់ (ស្រី ៦៣ នាក់)
២. និទ្ទេស B៖ សរុប ៤៩៨ នាក់ (ស្រី ៣៣៥ នាក់)
៣. និទ្ទេស C៖ សរុប ១,៤៦៩ នាក់ (ស្រី ១,០០៨ នាក់)
៤. និទ្ទេស D៖ សរុប ២,៩៣៧ នាក់ (ស្រី ១,៨៦៤ នាក់)
៥. និទ្ទេស E៖ សរុប ៣,០៩៨ នាក់ (ស្រី ១,៧៨៧ នាក់)
ក្នុងឱកាសដ៏មហោឡារិកនោះ ឯកឧត្តម អ៊ុន ចាន់ដា បានសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅចំពោះលោកគ្រូ-អ្នកគ្រូ អាណាព្យាបាលសិស្ស រួមទាំងអាជ្ញាធរពាក់ព័ន្ធគ្រប់លំដាប់ថ្នាក់ ដែលបានខិតខំលះបង់កម្លាំងកាយចិត្តក្នុងការបណ្តុះបណ្តាល និងចូលរួមទ្រទ្រង់ដំណើរការប្រឡងឱ្យប្រព្រឹត្តទៅដោយរលូន មានសុវត្ថិភាព ស្របតាមគោលការណ៍ច្បាប់ និងតម្លាភាពខ្ពស់។
ជាចុងក្រោយ ឯកឧត្តមអភិបាលខេត្ត បានផ្ញើសារអបអរសាទរ និងលើកទឹកចិត្តយ៉ាងកក់ក្តៅដល់ក្មួយៗជ័យលាភីទាំងអស់ ឱ្យបន្តខិតខំស្រាវជ្រាវ និងក្រសោបយកចំណេះដឹងថ្មីៗបន្ថែមទៀតនៅកម្រិតឧត្តមសិក្សា ឬការបណ្តុះបណ្តាលបច្ចេកទេស និងវិជ្ជាជីវៈ ដើម្បីពង្រឹងសមត្ថភាពខ្លួនឯង ក្លាយជាធនធានមនុស្សដ៏មានសក្តានុពល ចូលរួមចំណែកយ៉ាងសកម្មក្នុងការអភិវឌ្ឍខេត្តកំពង់ចាម និងប្រទេសជាតិឱ្យកាន់តែរីកចម្រើនរុងរឿង៕
