ខេត្តមណ្ឌលគិរី៖ នាវេលារសៀល ថ្ងៃទី២៧ ខែកក្កដា ឆ្នាំ២០២៦ នេះ រដ្ឋបាលស្រុកកោះញែក ក្រោមការដឹកនាំផ្ទាល់របស់ លោក សី ទូច អភិបាលនៃគណៈអភិបាលស្រុកកោះញែក បានសហការយ៉ាងជិតស្និទ្ធជាមួយកម្លាំងអធិការដ្ឋាននគរបាលស្រុក តំណាងដែនជម្រកសត្វព្រៃស្រែពក និងអង្គការជីវិតនិងធម្មជាតិ (WCS) បានចុះរៀបចំកម្មវិធីផ្សព្វផ្សាយអប់រំ និងលើកកម្ពស់ការយល់ដឹងអំពីច្បាប់ ជូនដល់សិស្សានុសិស្សនៃវិទ្យាល័យ ហ៊ុន សែន កោះញែក។
កម្មវិធីនេះបានប្រព្រឹត្តទៅក្រោមបរិយាកាសយ៉ាងស្រស់បំព្រង និងទទួលបានការចូលរួមយ៉ាងកុះករពីសំណាក់លោកនាយក នាយករង លោកគ្រូ អ្នកគ្រូ និងសិស្សានុសិស្ស សរុបចំនួន ៧៣៣នាក់ (ក្នុងនោះមានសិស្សស្រីចំនួន ៥០៧នាក់)។
ខ្លឹមសារសំខាន់ៗ នៃយុទ្ធនាការអប់រំ៖
១. សុវត្ថិភាពចរាចរណ៍ផ្លូវគោក៖ កម្លាំងសមត្ថកិច្ចបានពន្យល់ណែនាំអំពីច្បាប់ចរាចរណ៍ ការពាក់មួកសុវត្ថិភាពឱ្យបានត្រឹមត្រូវ ការបើកបរដោយការទទួលខុសត្រូវ និងការគោរពសិទ្ធិអាទិភាព ដើម្បីកាត់បន្ថយគ្រោះថ្នាក់ចរាចរណ៍ក្នុងចំណោមយុវជន។
២. ការប្រឆាំង និងផលប៉ះពាល់នៃគ្រឿងញៀន៖ យុទ្ធនាការបានបណ្តុះស្មារតីយុវជនឱ្យយល់ដឹងកាន់តែច្បាស់អំពីគ្រោះថ្នាក់ដ៏ធ្ងន់ធ្ងរនៃគ្រឿងញៀន ដែលបំផ្លាញទាំងអនាគត សុខភាព និងសុភមង្គលគ្រួសារ ព្រមទាំងបំផុសចលនា «និយាយថា ទេ ចំពោះគ្រឿងញៀន»។
៣. ក្រមបរិស្ថាន និងការអភិរក្សធនធានធម្មជាតិ៖ ដោយសារស្រុកកោះញែក ជាតំបន់ដែលមានគម្របព្រៃឈើ និងជីវៈចម្រុះសំខាន់ៗ តំណាងដែនជម្រកសត្វព្រៃស្រែពក និងអង្គការជីវិតនិងធម្មជាតិ បានអប់រំសិស្សានុសិស្សពីសារៈសំខាន់នៃក្រមបរិស្ថាន ការការពារសត្វព្រៃ ការពារព្រៃឈើ និងការចូលរួមថែរក្សាបរិស្ថានជុំវិញខ្លួនឱ្យបានស្អាត។
នៅក្នុងឱកាសនោះ លោក សី ទូច អភិបាលស្រុកកោះញែក បានថ្លែងអំណរគុណយ៉ាងជ្រាលជ្រៅចំពោះកិច្ចសហការពីគ្រប់ភាគីពាក់ព័ន្ធ និងបានផ្តាំផ្ញើដល់ក្មួយៗសិស្សានុសិស្សទាំងអស់ឱ្យខិតខំរៀនសូត្រ ជៀសឆ្ងាយពីអំពើអបាយមុខ និងរួមគ្នាក្លាយជាកម្លាំងចលករដ៏សំខាន់ក្នុងការអភិវឌ្ឍសហគមន៍ តាមរយៈការគោរពច្បាប់ និងការចូលរួមការពារបរិស្ថានធម្មជាតិនៅក្នុងមូលដ្ឋានរបស់ខ្លួន។
សកម្មភាពនេះឆ្លុះបញ្ចាំងឱ្យឃើញពីការយកចិត្តទុកដាក់ខ្ពស់របស់អាជ្ញាធរដែនដី និងអង្គការដៃគូ ក្នុងការកសាងធនធានមនុស្សប្រកបដោយគុណភាព សីលធម៌ និងការទទួលខុសត្រូវខ្ពស់ចំពោះសង្គមជាតិ៕
.