ខេត្តតាកែវ៖ ប្រជាពលរដ្ឋ និងភ្ញៀវទេសចរមួយចំនួន បានស្នើឱ្យថ្នាក់ដឹកនាំមន្ទីរទេសចរណ៍ខេត្តតាកែវ ជាពិសេសលោកប្រធានមន្ទីរ ចុះពិនិត្យ និងពង្រឹងការងារគ្រប់គ្រងរបស់មន្ត្រីប្រចាំការនៅតំបន់ទេសចរណ៍ប្រាសាទភ្នំដា ស្ថិតក្នុងស្រុកអង្គរបូរី ខេត្តតាកែវ បន្ទាប់ពីមានការរិះគន់ជាបន្តបន្ទាប់ពាក់ព័ន្ធនឹងបញ្ហាសំរាមដែលត្រូវបានគេបោះចោលនៅក្នុង និងជុំវិញបរិវេណរមណីយដ្ឋានប្រវត្តិសាស្ត្រមួយនេះ។
តាមការលើកឡើងរបស់ភ្ញៀវទេសចរ ការប្រទះឃើញសំរាមនៅតាមទីសាធារណៈ និងទីតាំងទស្សនាសំខាន់ៗក្នុងបរិវេណប្រាសាទភ្នំដា បានធ្វើឱ្យប៉ះពាល់យ៉ាងខ្លាំងដល់សោភ័ណភាព បរិស្ថាន និងមុខមាត់របស់តំបន់ទេសចរណ៍ ដែលជាបេតិកភណ្ឌវប្បធម៌ដ៏មានតម្លៃរបស់ខេត្តតាកែវ។
ប្រភពដដែលបានលើកឡើងថា អ្វីដែលគួរឱ្យសោកស្តាយនោះ គឺបញ្ហាសំរាមនេះកើតមាននៅក្នុងតំបន់ដែលមានមន្ត្រីប្រចាំការទទួលខុសត្រូវដោយផ្ទាល់។ ដូច្នេះ ប្រជាពលរដ្ឋបានចោទជាសំណួរថា ហេតុអ្វីបានជាស្ថានភាពអនាម័យនៅតំបន់ទេសចរណ៍មួយនេះនៅតែមិនទាន់មានការរៀបចំឱ្យបានសមរម្យ ខណៈមន្ត្រីជំនាញត្រូវបានដាក់ឱ្យប្រចាំការនៅទីនោះជាប្រចាំ។
ពលរដ្ឋមួយចំនួនបានលើកឡើងថា មន្ត្រីប្រចាំការគួរតែធ្វើជាគំរូល្អក្នុងការថែរក្សាបរិស្ថាន និងសណ្តាប់ធ្នាប់ ជាជាងបណ្តោយឱ្យមានសំរាមរាយប៉ាយ ដែលនាំឱ្យភ្ញៀវទេសចរមានការមិនពេញចិត្ត និងរិះគន់លើការគ្រប់គ្រងតំបន់ទេសចរណ៍។
ប្រាសាទភ្នំដា ត្រូវបានគេចាត់ទុកថា ជាតំបន់ទេសចរណ៍វប្បធម៌ និងប្រវត្តិសាស្ត្រដ៏សំខាន់មួយ ដែលមានសក្តានុពលខ្ពស់ក្នុងការទាក់ទាញភ្ញៀវទេសចរជាតិ និងអន្តរជាតិ។ ទោះជាយ៉ាងណា ការខ្វះការយកចិត្តទុកដាក់លើបញ្ហាអនាម័យ និងការគ្រប់គ្រងសំរាម អាចធ្វើឱ្យប៉ះពាល់ដល់បទពិសោធន៍របស់អ្នកទស្សនា និងបន្ថយភាពទាក់ទាញរបស់តំបន់នេះ។
ភ្ញៀវទេសចរបានស្នើឱ្យមន្ត្រីប្រចាំការនៅប្រាសាទភ្នំដា និងអាជ្ញាធរពាក់ព័ន្ធ បង្កើនការត្រួតពិនិត្យ ការប្រមូលសំរាម និងរៀបចំបរិស្ថានឱ្យមានភាពស្អាតជាប្រចាំ ព្រមទាំងផ្សព្វផ្សាយអប់រំដល់ភ្ញៀវឱ្យចូលរួមថែរក្សាអនាម័យរួមគ្នា។
ប្រជាពលរដ្ឋ និងភ្ញៀវទេសចរ សង្ឃឹមថា ថ្នាក់ដឹកនាំមន្ទីរទេសចរណ៍ខេត្តតាកែវ នឹងចុះពិនិត្យស្ថានភាពជាក់ស្តែង និងពង្រឹងការទទួលខុសត្រូវរបស់មន្ត្រីប្រចាំការនៅតំបន់ប្រាសាទភ្នំដា ដើម្បីធានាបាននូវភាពស្អាត សោភ័ណភាព និងការអភិរក្សតម្លៃបេតិកភណ្ឌវប្បធម៌ដ៏មានសារៈសំខាន់នេះ សម្រាប់ទុកជាមរតកដល់មនុស្សជំនាន់ក្រោយ៕
