រាជធានីភ្នំពេញ៖ ក្រោយពីបណ្ដាញសារព័ត៌មាន ពេញចិត្តមេឌា បានធ្វើការផ្សព្វផ្សាយជុំវិញបញ្ហាក្លិនស្អុយ និងការបំពុលបរិស្ថាន ដែលបង្កឡើងដោយក្រុមហ៊ុនផលិតជីមួយកន្លែងនៅខណ្ឌកំបូល អាជ្ញាធររាជធានីភ្នំពេញ និងមន្ត្រីជំនាញពាក់ព័ន្ធ បានចុះអនុវត្តវិធានការយ៉ាងម៉ឺងម៉ាត់ ដោយ «សម្រេចផ្អាកដំណើរការក្រុមហ៊ុន ជុង ហេង ហ្វើថឹឡាយហ្សឺ ខូអិលធីឌី» ជាបណ្តោះអាសន្ន និងដាក់ចេញនូវលក្ខខណ្ឌតឹងរ៉ឹងជាច្រើន ដើម្បីដោះស្រាយផលប៉ះពាល់ដែលកំពុងកើតមាន។
យោងតាមការបញ្ជាក់ពីលោក ឃឹម ស៊ុនសូដា អភិបាលខណ្ឌកំបូល ការចុះត្រួតពិនិត្យនេះធ្វើឡើងក្រោមការចាត់តាំងពីលោក ឃួង ស្រេង អភិបាលរាជធានីភ្នំពេញ ដោយសហការជាមួយមន្ទីរបរិស្ថានរាជធានីភ្នំពេញ និងក្រុមការងារក្រសួងបរិស្ថាន បន្ទាប់ពីទទួលបានការត្អូញត្អែរជាបន្តបន្ទាប់ពីប្រជាពលរដ្ឋដែលរស់នៅជុំវិញទីតាំងអាជីវកម្ម ស្ថិតក្នុងភូមិត្រពាំងក្រសាំង សង្កាត់បឹងធំ ខណ្ឌកំបូល។
ក្នុងប្រតិបត្តិការចុះពិនិត្យជាក់ស្តែង មន្ត្រីជំនាញបានរកឃើញថា សកម្មភាពអាជីវកម្មរបស់ក្រុមហ៊ុនបានបង្កឱ្យមានក្លិនស្អុយរំខានដល់ការរស់នៅរបស់ប្រជាពលរដ្ឋ និងមានការព្រួយបារម្ភអំពីផលប៉ះពាល់ដល់បរិស្ថានជុំវិញតំបន់នោះ។ ជាលទ្ធផល អាជ្ញាធរបានសម្រេចផ្អាកដំណើរការក្រុមហ៊ុនជាបណ្តោះអាសន្ន និងតម្រូវឱ្យម្ចាស់អាជីវកម្មផ្លាស់ប្តូរទីតាំងទៅកន្លែងសមស្របដែលមិនបង្កផលប៉ះពាល់ដល់សហគមន៍។
លើសពីនេះ ក្រុមហ៊ុនត្រូវបញ្ឈប់ការនាំចូលសំណល់សម្រាប់ផលិតកម្មបន្ថែម រៀបចំប្រមូល និងគ្រប់គ្រងសំណល់ដែលមានស្រាប់ឱ្យបានត្រឹមត្រូវក្នុងរយៈពេលពីរសប្តាហ៍ ព្រមទាំងទប់ស្កាត់ការហូរសំណល់រាវចូលដីស្រែរបស់ប្រជាពលរដ្ឋ។ អាជ្ញាធរក៏បានតម្រូវឱ្យម្ចាស់អាជីវកម្មទទួលខុសត្រូវចំពោះការផ្តល់សំណងដល់ពលរដ្ឋដែលរងផលប៉ះពាល់ផងដែរ។
ចំណាត់ការនេះត្រូវបានមហាជន និងប្រជាពលរដ្ឋក្នុងមូលដ្ឋានចាត់ទុកថា ជាវិធានការដ៏ត្រឹមត្រូវ និងទាន់ពេលវេលា ដែលបង្ហាញពីការយកចិត្តទុកដាក់របស់អាជ្ញាធរ និងមន្ត្រីជំនាញចំពោះសុខុមាលភាពរបស់ប្រជាពលរដ្ឋ ក៏ដូចជាការការពារបរិស្ថានឱ្យបានល្អប្រសើរ។
ជាមួយគ្នានេះ មតិមហាជនក៏បានលើកឡើងថា ករណីនេះគឺជាគំរូមួយបង្ហាញថា សារព័ត៌មានដែលផ្សព្វផ្សាយព័ត៌មានប្រកបដោយវិជ្ជាជីវៈ និងផ្អែកលើការពិត អាចជាស្ពានភ្ជាប់សំខាន់ក្នុងការជួយឱ្យអាជ្ញាធរទទួលបានព័ត៌មាន និងចាត់វិធានការដោះស្រាយបញ្ហាជូនប្រជាពលរដ្ឋបានទាន់ពេលវេលា។
អាជ្ញាធរបានបញ្ជាក់ថា ប្រសិនបើក្រុមហ៊ុនមានបំណងបើកដំណើរការឡើងវិញ ត្រូវឆ្លងកាត់ការត្រួតពិនិត្យ និងទទួលបានការអនុញ្ញាតពីស្ថាប័នមានសមត្ថកិច្ចជាមុនសិន ដើម្បីធានាថា អាជីវកម្មមិនបង្កផលប៉ះពាល់ដល់បរិស្ថាន និងសហគមន៍ដូចពេលកន្លងមកទៀតឡើយ៕
