ខេត្តតាកែវ៖ បើមិនមានអ្វីប្រែប្រួលទេ ព្រឹកថ្ងៃទី០៣ ខែមិថុនា ឆ្នាំ២០២៦ រដ្ឋបាលខេត្តតាកែវ គ្រោងរៀបចំពិធីប្រកាសចូលកាន់មុខតំណែងអភិបាលស្រុកត្រាំកក់ថ្មី ដោយលោក ហ៊ត មនោ អភិបាលរងក្រុងដូនកែវ ត្រូវបានថ្នាក់ដឹកនាំផ្តល់សេចក្តីទុកចិត្តតែងតាំងជាអភិបាល នៃគណៈអភិបាលស្រុកត្រាំកក់ ជំនួសលោក កេត ម៉ៅ ដែលត្រូវបានផ្ទេរទៅទទួលភារកិច្ចថ្មី។
ពិធីប្រកាសផ្ទេរ និងតែងតាំងមុខតំណែងនេះ គ្រោងប្រព្រឹត្តទៅក្រោមអធិបតីភាពលោក វ៉ី សំណាង អភិបាល នៃគណៈអភិបាលខេត្តតាកែវ ដោយមានការចូលរួមពីថ្នាក់ដឹកនាំខេត្ត មន្ត្រីរាជការ អាជ្ញាធរមូលដ្ឋាន កងកម្លាំងប្រដាប់អាវុធ និងភាគីពាក់ព័ន្ធជាច្រើនរូប។
ការផ្លាស់ប្តូរតួនាទីថ្នាក់ដឹកនាំរដ្ឋបាលនៅថ្នាក់មូលដ្ឋាននេះ ត្រូវបានចាត់ទុកថា ជាផ្នែកមួយនៃការពង្រឹងប្រសិទ្ធភាពការងារ ការគ្រប់គ្រងរដ្ឋបាល និងការផ្តល់សេវាសាធារណៈជូនប្រជាពលរដ្ឋឱ្យកាន់តែមានប្រសិទ្ធភាព ស្របតាមគោលនយោបាយកំណែទម្រង់វិមជ្ឈការនិងវិសហមជ្ឈការរបស់រាជរដ្ឋាភិបាល។
លោក ហ៊ត មនោ ត្រូវបានគេស្គាល់ថា ជាមន្ត្រីមានបទពិសោធន៍ក្នុងការងារគ្រប់គ្រងរដ្ឋបាល និងធ្លាប់បំពេញភារកិច្ចជាអភិបាលរងក្រុងដូនកែវនាពេលកន្លងមក ដោយបានចូលរួមចំណែកក្នុងការអភិវឌ្ឍមូលដ្ឋាន ការពង្រឹងសន្តិសុខ សណ្តាប់ធ្នាប់សាធារណៈ និងការបម្រើសេវាជូនប្រជាពលរដ្ឋ។
ចំណែកលោក កេត ម៉ៅ ដែលបានដឹកនាំរដ្ឋបាលស្រុកត្រាំកក់នាពេលកន្លងមក ក៏បានចូលរួមជំរុញការអភិវឌ្ឍមូលដ្ឋាន អនុវត្តគម្រោងហេដ្ឋារចនាសម្ព័ន្ធ ការលើកកម្ពស់សុខុមាលភាពប្រជាពលរដ្ឋ និងការថែរក្សាសន្តិសុខសង្គមនៅក្នុងមូលដ្ឋានផងដែរ។
ប្រជាពលរដ្ឋ និងមន្ត្រីរាជការនៅក្នុងស្រុកត្រាំកក់ សង្ឃឹមថា ថ្នាក់ដឹកនាំថ្មីនឹងបន្តសហការជាមួយគ្រប់ភាគីពាក់ព័ន្ធ ដើម្បីជំរុញការអភិវឌ្ឍមូលដ្ឋាន កែលម្អជីវភាពប្រជាពលរដ្ឋ និងរក្សាបាននូវសន្តិសុខ សណ្តាប់ធ្នាប់ និងការផ្តល់សេវាសាធារណៈប្រកបដោយគុណភាពខ្ពស់ជូនប្រជាពលរដ្ឋបន្តទៅទៀត៕
