នៅព្រឹកថ្ងៃទី០១ ខែឧសភា ឆ្នាំ២០២៦នេះ លោកឧកញ៉ា ម៉ុង រិទ្ធី បានមានប្រសាសន៍ឆ្លើយតបទៅនឹងបញ្ហា នៃការកាប់ដើមអាកាស្យា ដែលលោកបានខិតខំដាំ ជិត៦ម៉ឺនដើម នៅតំបន់ទេសចរណ៍ភ្នំជីសូរ ស្រុកសំរោង ខេត្តតាកែវនោះថា លោកគ្រាន់តែចង់ឱ្យមនុស្សចេះដឹងគុណ ទោសតែប៉ុណ្ណោះ លោកដឹងថាអ្នកណាជាអ្នកកាប់ “ប៉ុន្តែលោកមិនរករឿងអ្វីទេ”។
លោកឧកញ៉ាម៉ុងរិទ្ធីមានប្រសាសន៍ថា “ឋានៈដូចខ្ញុំទៅរករឿងអីរឿងអញ្ចឹងនោះ គ្រាន់តែចង់ឲ្យចេះដឹងគុណ ដឹងទោស។ ចុះបើដើមឈើម៉ែឪវាដាំវិញ,គេកាប់តែ១ដើម,វាឈឺចាប់ឬទេ?។ លោកឧកញ៉ាម៉ុងរិទ្ធីបានដឹងថា ដើមអាកាស្យានោះត្រូវបានកាប់យកទៅលក់។ តែយ៉ាង ណា ក៏ដោយ លោកឧកញ៉ាគ្រាន់តែចង់បាន អំពីការជូន ដំណឹងទៅអ្នកដែលខិតខំដាំនោះចំពោះការកាប់ដើមអាកាស្យានេះតែប៉ុណ្ណោះ។ លោកឧកញ៉ាបានមាន ប្រសាសន៍យ៉ាងនេះថា “បើខ្ញុំវិញ ជាការគួរសមប្រាប់ថាឥឡូវគេពង្រីកផ្លូវ(ដូច្នេះត្រូវកាប់)ប៉ុន្តែប្រហែលគេខ្លាចខ្ញុំទាមទារលុយនោះឬយ៉ាងម៉េច?”។
គួរបញ្ជាក់ថា ករណីនៃការកាប់ដើមអាកាស្យានៅជើងភ្នំជីសូរ ក្នុងស្រុកសំរោង ខេត្តតាកែវ បានទាក់ទាញការ ចាប់អារម្មណ៍មួយឈុល បន្ទាប់ពីចូលឆ្នាំថ្មីប្រពៃណីជាតិ នៅគ្រាដែលលោកឧកញ៉ាម៉ុងរិទ្ធី បានបង្ហោះសារសម្ដែងចម្ងល់អំពីករណីនៃការកាប់ដើមអាកាស្យាដែលលោកបានខិតខំដាំចំណាយពេលជាង៣០ឆ្នាំកន្លងមកហើយនោះ។ អ្វីដែលជាការសំខាន់នោះ គឺដើមអាកាស្យាធំៗទាំងឡាយត្រូវបានកាប់ដោយមិនបានប្រាប់១ម៉ាត់ទៅអ្នកដែលខិតខំដាំនោះឡើយ។
រដ្ឋបាលស្រុកសំរោង ហាក់ដូចជាស្ងប់ស្ងាត់ចំពោះករណីនៃការកាប់ដើមអាកាស្យានេះ បើទោះបីជារាប់ទាំងលើកនេះលោកឧកញ៉ាម៉ុង រិទ្ធី បានលើកឡើង៣ដងរួចមកហើយក៏ដោយ។ នៅក្នុងរឿងនេះស្រាប់តែលិចបុរសម្នាក់ជា បូរិទ្ធ ចេញមកតបតជាមួយលោកឧកញ៉ាម៉ុងរិទ្ធីដែរថា ធម្មតាការអភិវឌ្ឍតែងតែមានការកាប់យ៉ាងដូច្នេះដើម្បីពង្រីកផ្លូវ? លោកឧកញ៉ាម៉ុងរិទ្ធីគ្រាន់តែចង់ឲ្យអ្នកកាប់ប្រាប់អ្នកខំដាំ១ម៉ាត់ផងនៅពេលដែលកាប់នោះ៕
