ខេត្តកណ្ដាល៖ ក្រុមការងារចម្រុះរបស់រដ្ឋបាលខេត្តកណ្ដាល ដឹកនាំដោយ ឯកឧត្តម ហាក់ សុខមករា អភិបាលរងខេត្តកណ្ដាល នៅព្រឹកថ្ងៃទី២៦ ខែមីនា ឆ្នាំ២០២៦ បានចុះពិនិត្យជាក់ស្តែង និងអនុវត្តវិធានការផ្អាកភ្លាមៗលើសំណង់មួយកន្លែង ដែលសាងសង់ដោយគ្មានលិខិតអនុញ្ញាត នៅចំណុចផ្លូវចូលវត្តស្អាងភ្នំ ស្ថិតក្នុងឃុំព្រែកគយ ស្រុកស្អាង។
តាមការបញ្ជាក់ពីមន្ត្រីជំនាញ សំណង់ខាងលើជាកម្មសិទ្ធិរបស់បុគ្គលឈ្មោះ ស៊ុន លី និង ដុត សារ៉ន សាងសង់ពីថ្ម កម្ពស់២ជាន់ មានទំហំសរុបប្រមាណ ៣០៦ម៉ែត្រការ៉េ ទទឹង ៨,៤ម៉ែត្រ បណ្តោយ ១៨ម៉ែត្រ ខណៈដែលការសាងសង់កំពុងដំណើរការយ៉ាងសកម្ម។
យ៉ាងណាក៏ដោយ នៅពេលក្រុមការងារចុះត្រួតពិនិត្យ និងសាកសួរអំពីលិខិតអនុញ្ញាតសាងសង់ ម្ចាស់សំណង់មិនអាចបង្ហាញឯកសារផ្លូវការណាមួយបានឡើយ។ ការចុះអនុវត្តនេះធ្វើឡើងបន្ទាប់ពីមានសេចក្តីរាយការណ៍ពីប្រជាពលរដ្ឋ និងក្នុងគោលបំណងធានាថា រាល់សំណង់ទាំងអស់ ត្រូវគោរពតាមប្លង់គោលនគរូបនីយកម្ម និងបទដ្ឋានបច្ចេកទេសជាធរមាន។
បន្ទាប់ពីការពិនិត្យជាក់ស្តែង អាជ្ញាធរបានសម្រេចចាត់វិធានការផ្អាកការសាងសង់ភ្លាមៗ ដោយបញ្ជាឱ្យមេជាង និងកម្មករទាំងអស់បញ្ឈប់សកម្មភាពជាបន្ទាន់ រហូតដល់មានការដោះស្រាយតាមនីតិវិធីច្បាប់។ ជាមួយគ្នានេះ ក្រុមការងារបានធ្វើកំណត់ហេតុផ្អាកសកម្មភាព និងឱ្យមេជាងផ្តិតមេដៃទទួលដឹងឮ ខណៈម្ចាស់សំណង់មិនមានវត្តមាននៅទីតាំង។
ក្នុងឱកាសនោះ ឯកឧត្តម ហាក់ សុខមករា បានបញ្ជាក់យ៉ាងច្បាស់ថា ការសាងសង់ដោយគ្មានច្បាប់អនុញ្ញាត គឺជាការរំលោភច្បាប់សំណង់ ហើយអាចបង្កហានិភ័យដល់សុវត្ថិភាពអ្នករស់នៅ ក៏ដូចជាប៉ះពាល់ដល់សណ្តាប់ធ្នាប់សាធារណៈផងដែរ។
អាជ្ញាធរខេត្តកណ្ដាល ក៏បានអំពាវនាវដល់ប្រជាពលរដ្ឋ ម្ចាស់សំណង់ និងអ្នកអភិវឌ្ឍន៍ទាំងអស់ សូមអនុវត្តតាមនីតិវិធីច្បាប់ ដោយសុំលិខិតអនុញ្ញាតសាងសង់ជាមុន មុននឹងដំណើរការសាងសង់ ដើម្បីជៀសវាងការខាតបង់ពេលវេលា និងថវិកា ខណៈអាជ្ញាធរនឹងបន្តតាមដាន និងអនុវត្តច្បាប់យ៉ាងតឹងរ៉ឹង ចំពោះសំណង់ដែលល្មើស។
សូមបញ្ជាក់ថា ករណីសំណង់អត់ច្បាប់ខាងលើនេះ ត្រូវបានអង្គភាពសារព័ត៌មាន “ឌឹមីរ័រ” ចុះផ្សាយបង្ហាញការពិតជាមុនហើយ ដែលជាផ្នែកមួយក្នុងការចូលរួមលើកកម្ពស់ការអនុវត្តច្បាប់ និងតម្លាភាពក្នុងសង្គម។ ការឆ្លើយតបរហ័សពីសំណាក់អាជ្ញាធរខេត្តកណ្ដាល ក៏ត្រូវបានមហាជនមើលឃើញថា ជាជំហានវិជ្ជមានក្នុងការពង្រឹងការគ្រប់គ្រងសំណង់ និងរក្សាសណ្ដាប់ធ្នាប់សាធារណៈ ឱ្យកាន់តែមានប្រសិទ្ធភាព៕
