ប៉ៃលិន៖ នៅវេលាម៉ោង១០ព្រឹកថ្ងៃទី២៧ ខែធ្នូ ឆ្នាំ២០២៥នេះ លោកឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិកម្ពុជា និងលោក ណាត់តាផុន ណាក់ផានីត រដ្ឋមន្រ្តីស្តីទីការពារជាតិថៃ បានចាប់ផ្តើមបើកកិច្ចប្រជុំពិសេស គណៈកម្មាធិការព្រំដែនទូទៅកម្ពុជា-ថៃ (GBC) ដើម្បីជំរុញឱ្យមានបទឈប់បាញ់ឡើងវិញ។
កិច្ចប្រជុំ បានធ្វើឡើងនៅច្រកអន្តរជាតិព្រំ ខេត្តប៉ៃលិន ប្រទេសកម្ពុជា-ទល់នឹងផាកកាត ខេត្តចន្ទបុរី ប្រទេសថៃ ដែលធ្វើឡើងក្រោយពេលក្រុមលេខា GBC កម្ពុជា-ថៃ បើកកិច្ចប្រជុំចរចាគ្នារយៈពេល៣ថ្ងៃ ដែលភាគីទាំងពីរ បានឯកភាពគ្នាលើខ្លឹមសារ នៃសេចក្តីព្រាង សេចក្តីប្រកាសរួមកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) ដើម្បីដាក់ឲ្យរដ្ឋមន្ត្រីការពារជាតិប្រទេសទាំងពីរ ចុះហត្ថលេខានៅថ្ងៃទី២៧ ខែធ្នូនេះ។
គិតមកដល់ពេលនេះ មានរយៈពេល២ថ្ងៃហើយ ដែលសង្គ្រាមព្រំដែន ត្រូវបានផ្ទុះឡើងបន្ទាប់ពីកងទ័ពថៃ បានឈ្លានពានកម្ពុជាជាលើកទី២ តាំងពីថ្ងៃទី០៧ ខែធ្នូ ឆ្នាំ២០២៥។
គិតត្រឹមល្ងាចថ្ងៃទី២៦ ខែធ្នូ ឆ្នាំ២០២៥ អំពើឈ្លានពានរបស់រដ្ឋាភិបាល និងយោធាថៃ ជាពិសេសការផ្លោង និងទម្លាក់គ្រាប់គ្រប់ប្រភេទ គ្រប់ទម្រង់ ចូលតំបន់ស៊ីវិល បានបណ្តាលឱ្យពលរដ្ឋស៊ីវិល៣០នាក់ស្លាប់ និងរបួស៩០នាក់ ខណៈដែលមានពលរដ្ឋភៀសសឹក ៦៤៥.៩១៦នាក់ ក្នុងនោះស្ត្រី ៣៣៧.០៦៧នាក់ និងកុមារ២០៥.៣៨២នាក់។
ក្រសួងការពារជាតិ បានឱ្យដឹងថា កិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅ កម្ពុជា-ថៃ (GBC) នេះធ្វើឡើង ដើម្បីស្វែងរកបទឈប់បាញ់ និងការបញ្ឈប់នូវរាល់អរិភាពតាមបណ្តោយព្រំដែនកម្ពុជា-ថៃ។
បើតាមក្រសួងការពារជាតិ, កម្ពុជាសង្ឃឹមយ៉ាងមុតមាំថា កិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅ កម្ពុជា-ថៃ (GBC) នាពេលនេះនឹងបង្កើតបាននូវបទឈប់បាញ់មួយដែលអាចអនុវត្តបាន និងផ្តល់ឱកាសដល់ប្រជាពលរដ្ឋដែលរងផលប៉ះពាល់អាចត្រលប់ទៅរកទីលំនៅរបស់ខ្លួនដែលស្ថិតក្នុងទីតាំងដែលមានសុវត្ថិភាព និងជំរុញឱ្យប្រទេសទាំងពីរបន្តអនុវត្តយន្តការដែលមានស្រាប់ក្នុងការដោះស្រាយបញ្ហាដោយសន្តិវិធី៕
