ខេត្តតាកែវ÷ ប្រជាពលរដ្ឋបងប្អូនរស់នៅជាសមាជិក ភូមិភ្នំបាទេព ឃុំព្រែកផ្ទោល ស្រុកអង្គរបុរី ខេត្តតាកែវ ភាគច្រើនជាញាតិ មិត្តសាច់ឈាមនៅក្នុងភូមិតែមួយ បានរងរបួសរហូត ដល់៤នាក់ត្រូវបញ្ជូនទៅសង្គ្រោះបន្ទាន់និងកំពុងព្យាបាលនៅប្រទេសវៀតណាម ក្នុងពេលដែល២នាក់ត្រូវបានចាប់ខ្លួនមួយថ្ងៃបន្ទាប់មក ក្នុងករណីទំនាស់មិនដឹងរឿងហេតុដែលបានកើតឡើងនៅរសៀលថ្ងៃទី ២១ ខែ កញ្ញាឆ្នាំ ២០២៥។
អ្នកភូមិក៏ដូចជាសមាជិកក្រុមគ្រួសារភាគីរងគ្រោះបានអះអាងប្រាប់អ្នកកាសែតនៅព្រឹកថ្ងៃទី២៤ខែ កញ្ញានេះ នៅហ្នឹងភូមិភ្នំបាទេពឱ្យដឹងថា នៅរសៀលថ្ងៃទី២១ខែ កញ្ញា ពួកគាត់ដែលភាគច្រើនជាងញាតិមិត្តបងប្អូននឹង គ្នាបានត្រឡប់មកពីសែនដូនតាវិញ ដែលត្រូវជិះកាត់ តាមមុខផ្ទះឈ្មោះឈឺត(ផ្លូវមានតែមួយខ្សែរ) នៅពេលនោះក៏ជួបបងប្អូនស្រីនៅជិតមុខផ្ទះជនបង្កក៏បានសួរនាំគ្នាពីបញ្ហាបន្តិចបន្តួច ក៏ស្រាប់តែមានភាគីខាងជនបង្កជិះម៉ូតូយ៉ាងលឿនសំដៅមកវាយយកៗតែម្ដង ដោយគ្រាន់តែនិយាយថា ភាគីជនរងគ្រោះឈ្មោះវណ្ណៈ មើលមុខឌឺឱ្យខ្លួន។
នៅឯក្រោមផ្ទះក្រុមជនបង្កមានវង់ផឹកស៊ីមួយផងដែរ។ ស្របគ្នានោះក្រុមញាតិភាគីជនរងគ្រោះ បានជិះម៉ូតូមក ដល់ ក៏ក្លាយទៅជាបញ្ហាចម្រង់ចម្រាស់ប្រទាំងប្រទើសគ្នាមានអំពើហិង្សាជាបន្តទៀត។ ក្នុងពេលដែលក្រុមអ្នក ផឹកស៊ីក្រោមផ្ទះជនបង្ក ក៏បានចេញមកជួយជាកម្លាំងអន្តរាគមន៍ដល់គ្នីគ្នារបស់ពួកគេ។ អំពើហិង្សាកាន់តែរីករាលរហូតដល់មានការវាយទៅវិញមក បើទោះបីជាម្ដាយភាគីជនបង្កបានព្យាយាមបិទរបងផ្ទះ ក៏ពួកគេព្យាយាមលោតតាមរបងមកបង្កហិង្សាលើភាគីជនរងគ្រោះ។ដែរ។
សរុបជារួមភាគីជនរងគ្រោះរហូត៤នាក់ត្រូវបញ្ជូនទៅសង្គ្រោះនៅឯប្រទេសវៀតណាម ដែលក្នុងនោះសូម្បីក្មេងស្រីអាយុ២ឆ្នាំម្នាក់ ក៏រងរបួសជាំភ្នែកដែរ។ ភ្លាមៗក្រោយកើតហេតុ ក្រុមជនរងគ្រោះបានស្នើររកកិច្ចអន្តរាគមន៍ពីមន្ត្រីនគរបាលស្រុកអង្គរបុរី ប៉ុន្តែមិនបានលទ្ធផលនោះទេ ដោយនគរបាលប្រាប់ឲ្យទៅព្យាបាលរបួសសិន ហើយ១ថ្ងៃបន្ទាប់ក្រោយមក នៅពេលដែលក្រុមគ្រួសារជនរងគ្រោះនាំគ្នាទៅដាក់ពាក្យបណ្ដឹងនៅអធិការដ្ឋាននគរបាលស្រុកអង្គរបុរី មន្ត្រីនគរបាលនៅទីនោះប្រាប់ថា មិនចាំបាច់ដាក់ទេ ពីព្រោះខាងភាគីជនបង្កបានដាក់ពាក្យបណ្តឹង ទៅនៅឯមូលដ្ឋានបញ្ជាការដ្ឋានកងរាជអាវុធហត្ថស្រុករួចហើយ។
នៅរសៀលថ្ងៃទី២២ ខែកញ្ញា កម្លាំងកងរាជអាវុធហត្ថស្រុកអង្គរបុរី បានចុះទៅសួរនាំភាគីជនរងគ្រោះដល់ភូមិភ្នំបាទេព ហើយក៏បាននាំខ្លួនបុរសពីរនាក់មកសួរនាំនៅមូលដ្ឋានកងរាជអាវុធហត្ថស្រុកអង្គរបុរី រួចហើយក៏បានវាយខ្នោះដាក់លើឡាន បញ្ជូនមកបញ្ជាការដ្ឋានកងរាជ អាវុធហត្ថខេត្តតាកែវទៅ។ ក្រុមគ្រួសារភាគីជនរងគ្រោះចាត់ទុកទង្វើនៃការចាប់ខ្លួនភាគីជនរងគ្រោះដល់ទៅពីរនាក់ក្នុងពេលដែល៤នាក់ទៀត កំពុងព្យាបាលរបួសនៅឯប្រទេសវៀតណាមនោះថា ជាទង្វើអយុត្តិធម៌មិនអាចទទួលយកបាន។
មន្ត្រីកងរាជអាវុធហត្ថខេត្តតាកែវបានអះអាងថាបន្ទាប់ពីសួរនាំ,ភាគីជនរងគ្រោះតាមបណ្ដឹងរបស់ជនបង្កសមត្ថ កិច្ចយល់ឃើញថា វាជាការប្រើអំពើហិង្សា វាយទៅវាយមក។ដូច្នេះសមត្ថកិច្ចត្រូវបើកការស៊ើបអង្កេតតទៅ មុខទៀត។ យ៉ាងណាក៏ដោយមិនមែនមានន័យថា ភាគីជនបង្ករួចផុតពីការចោទប្រកាន់ពីសំណាញ់ច្បាប់នោះទេ។
គួរបញ្ជាក់ថា ភាគីជនបង្ក(ឈីត)ធ្លាប់មានបញ្ហានៃការ ប្រើអំពើហឹង្សាស្រដៀងគ្នានេះ ទៅលើអ្នកភូមិក្នុងស្រុកអង្គរបុរីផងដែរ។ កាលនោះជនបង្កបានវាយស្ត្រីម្នាក់ឲ្យរងរបួសរួចហើយបង់ប្រាក់ចំនួន 5000 ដុល្លារ និងតម្កល់ប្រាក់សាលាដំបូងខេត្តតាកែវដើម្បីរួចផុតពីការឃុំខ្លួននោះទៀតផង។ អ្នកភូមិនិយាយថាក្រុមគ្រួសារជនបង្ក ប្រៀបដូចជាក្រុមក្មេងពាលដែលសាហាវព្រៃផ្សៃ ប៉ុន្តែអ្នកភូមិភ្នំបាទេព គ្មានជម្រើសដែលត្រូវតែធ្វើដំណើរឆ្លងកាត់មុខផ្ទះក្រុមជនបង្កពួកគាត់បន្តនិយាយថា បើមានផ្លូវផ្សេងពួកគាត់មិនជិះកាត់មុខផ្ទះពួកជនបង្កនោះទេ៕
