ខេត្តតាកែវ៖ វិវាទការងារទ្រង់ទ្រាយធំនៅរោងចក្រស្បែកជើង ប្រាយ ហ្វ្លាស់ស៊ីង ឯ.ក (Bright Flushing Co. Ltd.) ស្ថិតក្នុងស្រុកត្រាំកក់ ត្រូវបានបញ្ចប់ដោយរលូនហើយ នៅថ្ងៃទី០៤ ខែវិច្ឆិកា ឆ្នាំ២០២៦ ក្រោមការសម្របសម្រួលផ្ទាល់ពីមន្ត្រីអធិការកិច្ចការងារនៃមន្ទីរការងារខេត្តតាកែវ សហការជាមួយអាជ្ញាធរមូលដ្ឋាន។
ការឈានទៅរកច្រកចេញដ៏ត្រចះត្រចង់នេះ បានកើតឡើងបន្ទាប់ពីភាគីរោងចក្របានយល់ព្រមដោះស្រាយតាមការទាមទារទាំង ៩ចំណុច របស់កម្មករនិយោជិតសរុប ២,៥២៦នាក់ (ស្រី ១,៩៥០នាក់) ដោយទទួលបានលទ្ធផលសំខាន់ៗរួមមាន៖
១. រក្សាអត្ថប្រយោជន៍ និងប្រាក់ឧបត្ថម្ភ រក្សាប្រាក់ថ្លៃធ្វើដំណើរ ២.៥ ដុល្លារដូចដើម សម្រុះសម្រួលទូទាត់ប្រាក់ឈ្នួលកន្លះថ្ងៃកំឡុងពេលកូដកម្មជាមួយថ្ងៃសម្រាកប្រចាំឆ្នាំ និងកំណត់ប្រាក់ឧបត្ថម្ភច្បាស់លាស់ (១៥$-៣០$) ករណីមានការព្យួរកិច្ចសន្យាការងារ។
២. កែលម្អបរិយាកាស និងលក្ខខណ្ឌការងារ បំពាក់កង្ហារបន្ថែមក្នុងរយៈពេល ២សប្តាហ៍ ធានាប្រព័ន្ធភ្លើងបំភ្លឺគ្រប់គ្រាន់ និងផ្គត់ផ្គង់សម្ភារៈប្រើប្រាស់ក្នុងការងារឱ្យបានពេញលេញ។
៣. ពង្រឹងសីលធម៌ និងការមិនរើសអើង ណែនាំថ្នាក់ដឹកនាំសហជីព និងប្រធានផ្នែកទាំងអស់ឱ្យប្រកបដោយចរិយាសម្បត្តិសមរម្យ និងអះអាងមិនមានការរើសអើង ឬបញ្ឈប់កម្មករ តំណាងសហជីពដែលបានចូលរួមធ្វើកូដកម្មឡើយ។
ផ្អែកលើដំណោះស្រាយឈ្នះឈ្នះនេះ បងប្អូនកម្មករនិយោជិតទាំងអស់បានបង្ហាញក្ដីសោមនស្សរីករាយ និងឯកភាពគ្នាត្រឡប់ចូលបំពេញការងារជាធម្មតាវិញ ចាប់ពីព្រឹកថ្ងៃទី០៥ ខែវិច្ឆិកា ឆ្នាំ២០២៦ តទៅ ខណៈមន្ត្រីជំនាញនឹងបន្តតាមដានការអនុវត្តជាក់ស្តែង ដើម្បីធានាសុខដុមនីយកម្មវិជ្ជាជីវៈក្នុងរោងចក្រ៕
