ខេត្តកណ្តាល៖ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ព្រមទាំងភរិយា ថ្នាក់ដឹកនាំ និងមន្ត្រីរាជការទាំងអស់នៃក្រសួង បានផ្ញើសារលិខិតចូលរួមរំលែកទុក្ខយ៉ាងក្រៀមក្រំ និងក្តុកក្តួលបំផុត ជូនចំពោះលោក ប៉ែត សារ៉ាត់ អនុប្រធានមន្ទីរសាធារណការ និងដឹកជញ្ជូនខេត្តកណ្តាល ព្រមទាំងក្រុមគ្រួសារ ចំពោះការទទួលមរណភាពរបស់ ឧបាសក ប៉ែត ស្លៀក ត្រូវជាឪពុកបង្កើត ឪពុកក្មេក និងជាជីតា។
ឧបាសក ប៉ែត ស្លៀក បានទទួលអនិច្ចកម្មនៅថ្ងៃសុក្រ ទី១៤ ខែសីហា ឆ្នាំ២០២៦ វេលាម៉ោង ៦:៥៥នាទីព្រឹក ក្នុងជន្មាយុ ៨៩ឆ្នាំ ដោយជរាពាធ។
នៅក្នុងសារលិខិតរំលែកទុក្ខ ឯកឧត្តមរដ្ឋមន្ត្រី បានសម្តែងនូវសេចក្តីរន្ធត់ និងសោកស្តាយយ៉ាងក្រៃលែងចំពោះការបាត់បង់រូបឧបាសក ដែលជាអ្នកមានគុណដ៏ខ្ពង់ខ្ពស់ មានតួនាទីយ៉ាងសំខាន់ក្នុងការចិញ្ចឹមបីបាច់ ថែរក្សា និងអប់រំទូន្មានបុត្រធីតា រហូតក្លាយជាធនធានមនុស្សដ៏មានតម្លៃសម្រាប់សង្គមជាតិ។
ជាមួយគ្នានេះ ឯកឧត្តមរដ្ឋមន្ត្រី និងសហការី ក៏បានបួងសួងសូមឱ្យដួងវិញ្ញាណក្ខន្ធរបស់ ឧបាសក ប៉ែត ស្លៀក បានទៅកាន់សុគតិភព និងសូមឱ្យក្រុមគ្រួសារមានកម្លាំងចិត្តមាំមួនដើម្បីឆ្លងកាត់ពេលវេលាដ៏សោកសៅនេះ។
ជាការឆ្លើយតប លោក ប៉ែត សារ៉ាត់ និងភរិយា ព្រមទាំងក្រុមគ្រួសារ បានសម្តែងនូវក្តីរំភើប និងអំណរគុណយ៉ាងជ្រាលជ្រៅបំផុត ចំពោះទឹកចិត្តអាណិតស្រឡាញ់ និងការផ្តល់កម្លាំងចិត្តដ៏ខ្ពង់ខ្ពស់ពីសំណាក់ ឯកឧត្តមរដ្ឋមន្ត្រី ថ្នាក់ដឹកនាំ និងមន្ត្រីរាជការនៃក្រសួងសាធារណការ និងដឹកជញ្ជូន។ លោកបានបញ្ជាក់ថា កាយវិការដ៏ថ្លៃថ្លានេះ នឹងស្ថិតនៅក្នុងការចងចាំ និងជាការដឹងគុណរបស់ក្រុមគ្រួសារជារៀងរហូត។
ទន្ទឹមនឹងនេះ តាងនាមឱ្យក្រុមគ្រួសារ លោក ប៉ែត សារ៉ាត់ ក៏បានបួងសួងសូមតេជៈបារមីនៃព្រះរតនត្រ័យ និងវត្ថុស័ក្តិសិទ្ធិក្នុងលោក តាមជួយបីបាច់ថែរក្សា និងប្រសិទ្ធពរជ័យ សិរីសួស្តី ជ័យមង្គល ជូនដល់ ឯកឧត្តមរដ្ឋមន្ត្រី ព្រមទាំងថ្នាក់ដឹកនាំ និងមន្ត្រីរាជការទាំងអស់ ឱ្យជួបប្រទះតែពុទ្ធពរទាំងបួនប្រការគឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ។
ព្រឹត្តិការណ៍នេះ បានស្តែងឱ្យឃើញយ៉ាងច្បាស់អំពីសាមគ្គីភាព ភាពស្និតស្នាល និងស្មារតីមនុស្សធម៌យ៉ាងជ្រាលជ្រៅរបស់ថ្នាក់ដឹកនាំក្រសួងសាធារណការ និងដឹកជញ្ជូន ក្នុងការយកចិត្តទុកដាក់ និងចែករំលែកការឈឺចាប់ជាមួយមន្ត្រីក្រោមឱវាទក្នុងគ្រាមានទុក្ខធុរៈ៕
