ភ្នំពេញ៖ នៅថ្ងៃទី២៣ ខែមេសា ឆ្នាំ២០២៦ លោក លី ឈុនអ៊ូ ហៅអ៊ូ ភេទប្រុស អាយុ ៤៧ឆ្នាំ បច្ចុប្បន្នស្នាក់នៅសង្កាត់វាលវង់ ខណ្ឌ៧មករា រាជធានីភ្នំពេញ បានចេញលិខិតបដិសេធជាផ្លូវការ ពាក់ព័ន្ធនឹងការផ្សព្វផ្សាយរូបភាពរបស់លោកក្នុងបណ្តាញសង្គម និងបណ្តាញសារព័ត៌មានមួយចំនួន ដែលភ្ជាប់ទៅនឹងសកម្មភាពលេងល្បែងស៊ីសងខុសច្បាប់។
តាមការបញ្ជាក់របស់លោក មានគណនី និងទំព័រព័ត៌មានមួយចំនួន ដូចជា “នាគរាជមានឬទ្ធិញ្ញស៍”, “ប៊ីហ្គា ស៊ីន ប៊ីហ្គាស៊ីន”, “RSN News”, “PN Asia”, “AK NEWS TV” និង “វុទ្ធី ព័ត៌មាន” បានធ្វើការផ្សព្វផ្សាយរូបភាពដែលមានមុខរបស់លោកភ្ជាប់ជាមួយសកម្មភាពខុសច្បាប់ខាងលើ។
លោក លី ឈុនអ៊ូ បានបដិសេធយ៉ាងដាច់ខាតចំពោះការផ្សព្វផ្សាយនេះ ដោយអះអាងថា រូបភាពទាំងនោះគឺជារូបភាពក្លែងក្លាយ ដែលបានកែច្នៃដោយប្រើប្រាស់បច្ចេកវិទ្យា ដោយគ្មានការអនុញ្ញាតពីលោកឡើយ។ លោកបានបញ្ជាក់ថា ការផ្សព្វផ្សាយបែបនេះ បានបង្កឲ្យមានការយល់ច្រឡំសាធារណៈ និងប៉ះពាល់យ៉ាងធ្ងន់ធ្ងរដល់កិត្តិយស សេចក្តីថ្លៃថ្នូរ និងកេរ្តិ៍ឈ្មោះរបស់លោក។
ជាមួយគ្នានេះ លោកបានស្នើសុំឲ្យអាជ្ញាធរមានសមត្ថកិច្ច ពិនិត្យ និងស្រាវជ្រាវករណីខាងលើ ដើម្បីបញ្ជាក់ការពិត និងអនុវត្តវិធានការតាមផ្លូវច្បាប់ ប្រសិនបើរកឃើញថាមានសកម្មភាពល្បែងស៊ីសងខុសច្បាប់ពិតប្រាកដ។
លោក លី ឈុនអ៊ូ ក៏បានអំពាវនាវទៅកាន់ក្រសួងព័ត៌មាន មេត្តាពិនិត្យ និងចាត់វិធានការសមស្រប តាមច្បាប់សារព័ត៌មាន និងក្រមសីលធម៌វិជ្ជាជីវៈ ចំពោះបណ្តាញ ឬបុគ្គលដែលពាក់ព័ន្ធ ក្នុងគោលបំណងការពារសិទ្ធិ និងសេចក្តីថ្លៃថ្នូររបស់ប្រជាពលរដ្ឋ៕
