ខេត្តកណ្ដាល៖ ខណៈដែលវិស័យអចលនទ្រព្យ និងសេដ្ឋកិច្ចកំពុងរីកចម្រើនយ៉ាងឆាប់រហ័ស នៅស្រុកស្អាង ខេត្តកណ្ដាល បញ្ហាសំណង់អត់ច្បាប់វិញ កំពុងលេចឡើងជាបញ្ហាគួរឱ្យព្រួយបារម្ភ ដោយមានសំណង់មួយចំនួនត្រូវបានសង្កេតឃើញថា កំពុងសាងសង់ដោយគ្មានលិខិតអនុញ្ញាតត្រឹមត្រូវ និងមិនគោរពតាមបទដ្ឋានបច្ចេកទេស។ ជាពិសេសសំណង់ដែលមានម្ចាស់ឈ្មោះ ញិល ខ្លឹង នៅភូមិតានូ ឃុំស្អាងភ្នំ ស្រុកស្អាង ខេត្តកណ្ដាល។ នេះបើតាមប្រភពបណ្តាញសារព័ត៌មានពេញចិត្តមេឌាទទួលបាន។
ប្រភពពីមូលដ្ឋានបង្ហាញថា បញ្ហានេះ មិនត្រឹមតែបំផ្លាញសណ្ដាប់ធ្នាប់ក្នុងការគ្រប់គ្រងដីធ្លី និងនគរូបនីយកម្មប៉ុណ្ណោះទេ ប៉ុន្តែថែមទាំងបង្កហានិភ័យដល់សុវត្ថិភាពសាធារណៈ និងប៉ះពាល់ដល់សោភ័ណភាពតំបន់ផងដែរ។ បទពិសោធន៍ពីអតីតកាលបានបញ្ជាក់ថា សំណង់ខុសច្បាប់អាចនាំឲ្យមានវិបត្តិធ្ងន់ធ្ងរ ដូចករណីអគាររលំនៅខេត្តព្រះសីហនុ ដែលបណ្តាលឲ្យមានការបាត់បង់ជីវិត និងរបួសជាច្រើន។
ជុំវិញសំណង់អត់ច្បាប់នេះ លោក មិ ពិន មេឃុំស្អាងភ្នំ បានប្រាប់អ្នកកាសែតអោយដឹងថា លោកបានប្រាប់ឱ្យម្ចាស់សំណងនៅភូមិតានូ ឃុំស្អាងភ្នំ ស្រុកស្អាង ឈ្មោះ ញិល ខ្លឹង ទៅសុំច្បាប់ដែរ ព្រោះលោកបានមើលឃើញថា សំណង់នោះមានលក្ខណៈធំខ្លាំង ហើយលោកក៏ធ្លាប់បានឱ្យក្រុមការងារចុះទៅពីនិត្យនិងហាមឃាត់ដែរ ដោយពេលនោះ លោកមិនបានចូលរួមទេ ព្រោះលោកបានជួបគ្រោះថ្នាក់ចរាចរណ៍។
ពាក់ព័ន្ធខាងលើនេះ លោក ចាប ពលវឌ្ឍន៍ ប្រធានការិយាល័យរៀបចំដែនដី នគរូបនីកម្ម សំណង់ និងភូមិបាលស្រុកស្អាង បានឱ្យដឹងថា មន្ត្រីជំនាញបានធ្លាប់ចុះទៅហាមឃាត់ និងធ្វើកំណត់ហេតុឲ្យផ្អាកសំណង់រួចមកហើយ។ ទោះជាយ៉ាងណា ការអះអាងនេះ មិនទាន់ត្រូវបានបង្ហាញជាឯកសារផ្លូវការដល់សាធារណៈនៅឡើយទេ។
ទាក់ទិនករណីប្រភពបានលើកជាចម្ងល់ថា ប្រសិនបើមានការហាមឃាត់ពិតប្រាកដ ហេតុអ្វីសំណង់នោះ នៅតែអាចបន្តសាងសង់យ៉ាងសកម្មដល់សព្វថ្ងៃបាន? តើបញ្ហានេះបណ្តាលមកពីការខ្វះការតាមដាន ឬការអនុវត្តច្បាប់មិនមានប្រសិទ្ធភាព?
ចំពោះបញ្ហានេះ លោក ជឺ គឹមហៃ អភិបាលស្រុកស្អាង បានឲ្យដឹងថា ជាគោលការណ៍ ឥឡូវរាល់សំណង់ថ្មី យើងនឹងចុះត្រួតពិនិត្យ និងហាមឃាត់ ទោះបីមិនទាន់ដឹងច្បាស់ថា នៅទីតាំងណាខ្លះក៏ដោយ។ ក្រុមការងារនឹងចុះពិនិត្យទាំងអស់ ដើម្បីមើលថាមានច្បាប់ឬអត់? ប្រសិនបើគ្មានច្បាប់ នឹងអនុវត្តតាមនីតិវិធី។ បើចុះហាមហើយមិនអនុវត្តតាម យើងនឹងរាយការណ៍ទៅក្រុមការងារខេត្ត ដើម្បីចាត់វិធានការបន្ត។
គួររំលឹកថា ពាក់ព័ន្ធសំណង់អត់ច្បាប់នៅស្រុកស្អាង កាលពីព្រឹកថ្ងៃទី២៦ ខែមីនា ឆ្នាំ២០២៦ ឯកឧត្តម ហាក់ សុខមករា អភិបាលរងខេត្តកណ្ដាល បានចុះពិនិត្យ និងអនុវត្តវិធានការផ្អាកភ្លាមៗលើសំណង់មួយកន្លែង សាងសង់ដោយគ្មានលិខិតអនុញ្ញាត នៅចំណុចផ្លូវចូលវត្តស្អាងភ្នំ ស្ថិតក្នុងឃុំព្រែកគយ ស្រុកស្អាង។ សំណង់នោះជាកម្មសិទ្ធិរបស់បុគ្គលឈ្មោះ ស៊ុន លី និង ដុត សារ៉ន មានកម្ពស់២ជាន់ និងទំហំប្រមាណ ៣០៦ ម៉ែត្រការ៉េ។
គួររំលឹកបន្ថែមថា កាលពីថ្ងៃទី១២ ខែមីនា ឆ្នាំ២០២៦ ឯកឧត្តម ហាក់ សុខមករា បានសង្កត់ធ្ងន់ថា ខេត្តកណ្ដាលកំពុងមានសន្ទុះអភិវឌ្ឍលឿន ដូច្នេះការគ្រប់គ្រងសំណង់ត្រូវអនុវត្តឱ្យបានម៉ឺងម៉ាត់ និងត្រឹមត្រូវ ដើម្បីជៀសវាងសំណង់ខុសច្បាប់ និងធានាសុវត្ថិភាពសាធារណៈ។ ឯកឧត្តមក៏បានណែនាំឱ្យមន្ទីរជំនាញ និងអាជ្ញាធរមូលដ្ឋាន បន្តចុះផ្សព្វផ្សាយ និងណែនាំម្ចាស់សំណង់អំពីនីតិវិធីសាងសង់ត្រឹមត្រូវ ដើម្បីធានាបាននូវសំណង់មានស្តង់ដារ និងការអភិវឌ្ឍមានរបៀបរៀបរយ។
ទោះបីជាមានវិធានការនិងការណែនាំជាបន្តបន្ទាប់ក៏ដោយ បញ្ហាសំណង់អត់ច្បាប់នៅតំបន់មួយចំនួននៅស្រុកស្អាង នៅតែបន្តកើតមាន ដែលបង្ហាញថា ការអនុវត្តច្បាប់នៅតែមានចន្លោះត្រូវការកែលម្អ។ ក្នុងន័យនេះ អ្នកជំនាញ និងមតិសាធារណៈ មើលឃើញថា ការដោះស្រាយមិនគួរអាស្រ័យតែការបង្ក្រាបប៉ុណ្ណោះទេ ប៉ុន្តែត្រូវរួមបញ្ចូលការពង្រឹងប្រព័ន្ធត្រួតពិនិត្យ ការអនុវត្តច្បាប់ឲ្យមានតម្លាភាព និងការអប់រំប្រជាពលរដ្ឋឲ្យយល់ដឹងពីកាតព្វកិច្ចផ្លូវច្បាប់។ សំណង់អត់ច្បាប់មិនមែនជាសញ្ញានៃការអភិវឌ្ឍឡើយ ប៉ុន្តែជាសញ្ញានៃការខ្វះប្រសិទ្ធភាពក្នុងការគ្រប់គ្រង។ ប្រសិនបើមិនមានវិធានការតឹងរឹង និងទាន់ពេលវេលា ស្រុកស្អាងអាចប្រឈមនឹងបញ្ហាស្មុគស្មាញ ដែលពិបាកស្តារឡើងវិញនៅពេលអនាគត។
មហាជនសំនូមពរដល់ថ្នាក់ដឹកនាំខេត្តកណ្ដាល និងលោក សុក កាន់ណារិទ្ធ ប្រធានមន្ទីររៀបចំដែនដី នគរូបនីកម្ម និងសំណង់ខេត្តកណ្ដាលចាត់មន្ត្រីជំនាញចុះពិនិត្យនិងអនុវត្តវិធានការច្បាប់ឱ្យបានតឹងរឹងចំពោះម្ខាស់សំណង់ និងការដ្ឋានសំណង់អត់ច្បាប់ទាំងនោះផង៕
