រាជធានីភ្នំពេញ៖ យោងតាមការលើកឡើងពីប្រជាពលរដ្ឋដែលរស់នៅ និងធ្វើដំណើរតាមបណ្តោយផ្លូវជាតិលេខ៤ នៅចំណុចផ្សារជម្ពូវ័ន្ត ស្ថិតក្នុងសង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ បានបង្ហាញការព្រួយបារម្ភយ៉ាងខ្លាំងចំពោះបញ្ហាអត់សណ្ដាប់ធ្នាប់ និងភាពអាណាធិបតេយ្យ ដែលកើតមានជាប្រចាំថ្ងៃ។
នៅព្រឹកថ្ងៃទី១៧ ខែមីនា ឆ្នាំ២០២៦ ស្ថានភាពចរាចរណ៍ក្នុងតំបន់នេះ ត្រូវបានរាយការណ៍ថា មានការកក់ស្ទះរៀងរាល់ថ្ងៃ បណ្តាលមកពីការលក់ដូររាលដាលលើចិញ្ចើមផ្លូវ និងការប្រើប្រាស់ផ្លូវសាធារណៈធ្វើជាកន្លែងប្រកបអាជីវកម្ម ដោយគ្មានការរៀបចំត្រឹមត្រូវ។
ប្រជាពលរដ្ឋបានលើកឡើងថា បញ្ហានេះមិនត្រឹមប៉ះពាល់ដល់ចរាចរណ៍ប៉ុណ្ណោះទេ ប៉ុន្តែថែមទាំងប៉ះពាល់ដល់បរិស្ថាន និងសោភ័ណភាពទីក្រុងផងដែរ។
ប្រជាពលរដ្ឋមួយចំនួនក៏បានអះអាងថា មានក្រុមមនុស្សខ្លះ ដើរប្រមូលប្រាក់ពីអាជីវករលក់ដូរលើចិញ្ចើមផ្លូវជាប្រចាំថ្ងៃ ដោយមិនមានភាពច្បាស់លាស់អំពីផ្លូវច្បាប់ ឬការអនុញ្ញាតផ្លូវការណាមួយឡើយ។ សកម្មភាពនេះ អាចនាំឲ្យកើតមានអំពើមិនប្រក្រតី និងប៉ះពាល់ដល់សណ្ដាប់ធ្នាប់សង្គម ប្រសិនបើមិនមានការត្រួតពិនិត្យយ៉ាងតឹងរឹង។
ក្រោមការដឹកនាំរបស់លោក សក់ ច័ន្ទកញ្ញារិទ្ធ ចៅហ្វាយខណ្ឌពោធិ៍សែនជ័យ ប្រជាពលរដ្ឋសង្ឃឹមថា អាជ្ញាធរមូលដ្ឋាននឹងចូលរួមអនុវត្តវិធានការប្រកបដោយប្រសិទ្ធភាព ដើម្បីរៀបចំសណ្ដាប់ធ្នាប់ឡើងវិញ ធានាសុវត្ថិភាពចរាចរណ៍ ការពារបរិស្ថាន និងរក្សារបៀបរស់នៅប្រចាំថ្ងៃឲ្យមានភាពរលូន។
ជាមួយគ្នានេះ ប្រជាពលរដ្ឋក៏បានសំណូមពរឲ្យមានការសហការយ៉ាងជិតស្និទ្ធរវាងអាជ្ញាធរ និងប្រជាជន ដើម្បីដោះស្រាយបញ្ហានេះឲ្យបានប្រសើរឡើងនាពេលខាងមុខ៕
