ភ្នំពេញ÷អាជ្ញាធរខណ្ឌមានជ័យនៅថ្ងៃទី២៨ខែតុលាឆ្នាំ ២០២៥ បានដឹកនាំក្រុមការងារចុះពិនិត្យសំណង់បំពាន ច្បាប់១កន្លែង ដែលមានផ្ទះ៣ល្វែងនៅតំបន់លូ៥ ស្ថិតក្នុងភូមិដំណាក់ធំ៣ សង្កាត់ស្ទឹងមានជ័យ៣ ខណ្ឌមាន ជ័យ រាជធានីភ្នំពេញ។ ម្ចាស់សំណង់បំពានច្បាប់ទាំង៣ ល្វែងនេះ បានទទួលយកសំណងពីរាជរដ្ឋាភិបាលរួច ហើយ ហេតុអ្វីនៅតែបំពានច្បាប់យ៉ាងដូច្នេះ?
បើតាមសេចក្តីរាយការណ៍ឲ្យដឹងថា នៅក្នុងចំណោម ផ្ទះល្វែងសង់រំលោភផ្លូវទាំងនោះ មាន១ល្វែងសង់បាន ៦៥% និងមានកម្ពស់រហូតដល់៥ជាន់រួចហើយ។ ក្រុម ការងារខណ្ឌមានជ័យបានចុះទៅដល់ដោយត្រួតពិនិត្យឃើញថា ទីតាំងសាងសង់ខាងលើបាន និងកំពុងសាង សង់ចំនួន៥ជាន់ (Eo-E⁵) សម្រេច៦៥%ដោយគ្មានច្បាប់អនុញ្ញាតិ ហើយក្នុងនោះម្ចាស់បានទទួលប្រាក់ សំណងពីក្រសួងសេដ្ឋកិច្ចនិងហិរញ្ញវត្ថុ រួចរាល់ស្ដីពីការស្ថាបនាលូ៥ ហើយម្ចាស់នៅតែសាងសង់រំលោភលើគោលការណ៍ដែលបានដោះស្រាយផលប៉ះពាល់ប្រវែង ១,៥០ម៉ែត្រ។
ដោះស្រាយបញ្ហាប្រឈមនេះក្រុមការងារខណ្ឌមានជ័យបានណែនាំ÷១-ម្ចាស់ទីតាំងប្រមូលខ្សាច់ថ្ម ចេញពីចំណីផ្លូវជៀសវាងមានការកកស្ទះឬគ្រោះថ្នាក់,២-ម្ចាស់សំណង់ត្រូវហ៊ុំព័ទ្ធការដ្ឋានឲ្យបានត្រឹមត្រូវ,៣-ម្ចាស់សំណង់ត្រូវរុះរើសំណង់ ដែលបានសង់លើសចូលក្នុងចំណីផ្លូវដែលក្រសួងបានសងប្រវែង១,៥០ម៉ែត្រនិង ៤- ម្ចាស់ត្រូវរុះរើសំណង់ដែលសង់លើសប្រវែង១,៥០ម៉ែត្រ ដោយទុករយៈពេល២១ថ្ងៃជាកំហិត។ បើមិនដូច្នោះទេ
រដ្ឋបាលខណ្ឌមានជ័យនឹងធ្វើការតាមផ្លូវច្បាប់។
លោកសាំង ស៊ីណា ចៅសង្កាត់ស្ទឹងមានជ័យ៣បានឱ្យដឹងថា ម្ចាស់ផ្ទះ៣ល្វែងពិតជាបានសង់លើចំណីផ្លូវដែលរដ្ឋបានទូទាត់សំណងរួចហើយនោះមែន។ ដូច្នេះអាជ្ញាធរខណ្ឌមានជ័យបានកំណត់រយៈពេល២១ថ្ងៃដើម្បីឲ្យពួកគាត់រុះរើសំណង់ដែលលើស មកលើចិញ្ចើមផ្លូវនោះចេញ។ ម្ចាស់សំណង់បានទទួលសំណងពីរាជ រដ្ឋាភិបាលរួចរាល់អស់ហើយ។ លោកចៅសង្កាត់បញ្ជាក់ថា អាជ្ញាធរនឹងបន្តតាមដានមើលបន្ថែមទៀត។
លោកគឹម ឈួង ម្ចាស់ផ្ទះដែលមានកម្ពស់៥ជាន់ បានអះអាងថា នឹងអនុវត្តតាមការសម្រេចរបស់អាជ្ញាធរខណ្ឌមានជ័យ។ ប៉ុន្តែថាវាមិនមែនជាប្រភេទសំណង់ថ្មីហើយក៏មិនមែនជាអគារធំធេងអ្វីនោះដែរ។ លោកបានបញ្ជាក់ថា វាជាសំណង់ចាស់ដែលមានទទឹង៥ម៉ែត្រនិងបណ្ដោយ៦ម៉ែត្រប៉ុណ្ណោះ។
យ៉ាងណាក៏ដោយ ប្រជាពលរដ្ឋនឹងបន្តតាមដានមើល
ថាតើអាជ្ញាធរខណ្ឌមានជ័យ នឹងចាត់វិធានការយ៉ាងណាទៀតបន្ទាប់ពីរយៈពេលឱសានវាទត្រូវបានបញ្ចប់។ ពី ព្រោះគេមិនរំពឹងថា ម្ចាស់សំណង់ដែលមានកម្ពស់៥ ជាន់នោះ នឹងត្រូវសុខចិត្តកាត់១កំណាត់មុខប្រវែង ១,៥០ ម៉ែត្រនោះទេ៕
