តាកែវ៖ លោក ញ៉ែម ស្រស់ អភិបាលរងខេត្តតាកែវ បានណែនាំ និងជំរុញដល់មន្ទីរ-អង្គភាពជុំវិញខេត្ត ឱ្យបន្តយកចិត្តទុកដាក់ និងសហការយ៉ាងសកម្មជាមួយក្រុមការងារផែនការវិនិយោគខេត្ត ក្នុងការផ្ដល់ធាតុចូល និងយុទ្ធសាស្ត្រគន្លឹះ ដើម្បីរៀបចំកសាងសេចក្ដីព្រៀង ផែនការអភិវឌ្ឍន៍រយៈពេល ៥ ឆ្នាំរបស់ខេត្ត និង កម្មវិធីវិនិយោគបីឆ្នាំរំកិល (២០២៦-២០២៨) ឱ្យបានទាន់ពេលវេលា ស្របតាមការកំណត់របស់ក្រសួងមហាផ្ទៃ។
ការណែនាំនេះត្រូវបានធ្វើឡើង នៅក្នុងវេទិកាពិគ្រោះយោបល់ស្ដីពីការកសាងកម្មវិធីវិនិយោគបីឆ្នាំរំកិល (២០២៦-២០២៨) របស់ខេត្ត និងផ្សព្វផ្សាយសិក្ខាសាលាសមាហរណកម្មកម្មវិធីវិនិយោគបីឆ្នាំរំកិលក្រុងស្រុក-ឃុំសង្កាត់ ដែលរៀបចំឡើងនៅសាលប្រជុំរដ្ឋបាលខេត្ត នាព្រឹកថ្ងៃទី២២ ខែតុលា ឆ្នាំ២០២៥។
ថ្លែងក្នុងឱកាសនោះ លោក ញ៉ែម ស្រស់ អភិបាលរងខេត្តតាកែវ បានគូសបញ្ជាក់ថា ផែនការអភិវឌ្ឍន៍មូលដ្ឋានរយៈពេល ៥ ឆ្នាំនេះ គឺជាចក្ខុវិស័យអភិវឌ្ឍន៍ចម្បងរបស់ខេត្ត សំដៅអភិវឌ្ឍហេដ្ឋារចនាសម្ព័ន្ធ និងសមិទ្ធផលនានានៅតាមមូលដ្ឋានឱ្យកាន់តែរីកចម្រើនបន្ថែមទៀត។ ការងារនេះគឺស្របពេលដែលប្រទេសជាតិកំពុងមានសុខសន្តិភាពពេញលេញ ក្រោមការដឹកនាំរបស់រាជរដ្ឋាភិបាលកម្ពុជា អាណត្តិទី៧ ដែលមាន សម្ដេចធិបតី ហ៊ុន ម៉ាណែត ជាប្រមុខដឹកនាំ។
លោកក៏បានសង្កត់ធ្ងន់លើតួនាទីរបស់មន្ទីរ និងមន្ត្រីជំនាញទាំងអស់ថា៖ «មន្ទីរ និងមន្ត្រីជំនាញត្រូវចូលរួមសហការគ្នា ធ្វើយ៉ាងណាឱ្យកម្មវិធីអភិវឌ្ឍន៍ខេត្ត រួមទាំងកម្មវិធីវិនិយោគបីឆ្នាំរំកិល ដែលបានដាក់ចេញទទួលបានជោគជ័យ និងឆ្លើយតបទៅនឹងតម្រូវការជាក់ស្ដែងរបស់ប្រជាពលរដ្ឋ»។
លោក ញ៉ែម ស្រស់ បានបន្ថែមទៀតថា កិច្ចប្រជុំនាពេលនេះមានគោលបំណងសំខាន់ៗចំនួនពីរ ទី១៖ ដើម្បីប្រយោជន៍ដល់ការកសាងកម្មវិធីវិនិយោគបីឆ្នាំរំកិល របស់ក្រុង ស្រុក ឃុំ សង្កាត់ ប្រកបដោយ តម្លាភាព និង សង្គតិភាព។ គោលបំណងនេះក៏ដើម្បីពង្រឹងការអនុវត្តគោលការណ៍ទាំង ៩ និងវប្បធម៌ប្រជាធិបតេយ្យ ក្នុងដំណើរការនៃកម្មវិធីវិនិយោគបីឆ្នាំរំកិលនៅថ្នាក់ក្រោមជាតិ និងទី២៖ ផ្សព្វផ្សាយសិក្ខាសាលាសមាហរណកម្មកម្មវិធីវិនិយោគបីឆ្នាំរំកិល ក្រុង-ស្រុក និង ឃុំ-សង្កាត់ របស់ខេត្តតាកែវ ឱ្យបានទូលំទូលាយទៅលើគម្រោង និងសកម្មភាពជាអាទិភាពនៃរដ្ឋបាលថ្នាក់ក្រោមជាតិ។ នេះគឺដើម្បីស្វែងរកការគាំទ្រពីស្ថាប័នជាតិ-អន្តរជាតិ ដៃគូអភិវឌ្ឍន៍ និងផ្នែកឯកជននានា សម្រាប់កិច្ចការអភិវឌ្ឍន៍ និងការកាត់បន្ថយភាពក្រីក្រក្នុងមូលដ្ឋានឱ្យបានឆាប់រហ័ស ស្របតាមចក្ខុវិស័យរបស់រដ្ឋបាលខេត្ត និងគោលនយោបាយរបស់រាជរដ្ឋាភិបាលអាណត្តិទី៧៕
