តាកែវ៖ នៅថ្ងៃទី២៩ ខែកញ្ញា ឆ្នាំ២០២៦ លោកឧត្តមសេនីយ៍ត្រី សេង មហា មេបញ្ជាការ កងរាជអាវុធហត្ថខេត្តតាកែវ បានអញ្ជើញជាអធិបតីក្នុងពិធីប្រជុំផ្សព្វផ្សាយការងារសោធននិវត្តន៍ ឆ្នាំ២០២៧ របស់កងរាជអាវុធហត្ថខេត្តតាកែវ ដោយមានការចូលរួមពីថ្នាក់ដឹកនាំ និងមន្ត្រីពាក់ព័ន្ធជាច្រើនរូប។
ពិធីនេះ ប្រព្រឹត្តទៅនៅសាលប្រជុំអគារសេនាធិការ នៃបញ្ជាការដ្ឋានកងរាជអាវុធហត្ថខេត្តតាកែវ ដោយមានការចូលរួមពីលោកមេបញ្ជាការរង លោកប្រធាន-អនុប្រធានមន្ទីរទាំង៧ លោកនាយការិយាល័យដែលពាក់ព័ន្ធ ព្រមទាំងលោកមេបញ្ជាការ មូលដ្ឋានកងរាជអាវុធហត្ថក្រុង-ស្រុកទាំង១០ ក្នុងខេត្តតាកែវ។
កិច្ចប្រជុំនេះត្រូវបានរៀបចំឡើងក្នុងគោលបំណងផ្សព្វផ្សាយ និងពង្រឹងការយល់ដឹងពាក់ព័ន្ធនឹងការងារសោធននិវត្តន៍ ឆ្នាំ២០២៧ ដល់ថ្នាក់ដឹកនាំ និងមន្ត្រីដែលពាក់ព័ន្ធ ដើម្បីឱ្យការអនុវត្តនីតិវិធី និងការរៀបចំឯកសារពាក់ព័ន្ធ ប្រព្រឹត្តទៅដោយមានភាពត្រឹមត្រូវ ច្បាស់លាស់ និងស្របតាមបទប្បញ្ញត្តិជាធរមាន។
ជាមួយគ្នានេះ កិច្ចប្រជុំក៏ជាវេទិកាសម្រាប់ថ្នាក់ដឹកនាំ និងមន្ត្រីពាក់ព័ន្ធ ផ្សព្វផ្សាយព័ត៌មាន ចែករំលែកការយល់ដឹង និងពិនិត្យលើចំណុចដែលត្រូវយកចិត្តទុកដាក់ក្នុងការអនុវត្តការងារសោធននិវត្តន៍ សំដៅធានាឱ្យដំណើរការងារនេះមានប្រសិទ្ធភាព និងអាចអនុវត្តបានស្របតាមគោលការណ៍ដែលបានកំណត់។
លោកឧត្តមសេនីយ៍ត្រី សេង មហា ក៏បានដឹកនាំ និងផ្តល់ការណែនាំដល់សមាសភាពចូលរួម ឱ្យយកចិត្តទុកដាក់លើការងារពាក់ព័ន្ធ ដើម្បីធានាឱ្យការរៀបចំការងារសោធននិវត្តន៍ ឆ្នាំ២០២៧ របស់កងរាជអាវុធហត្ថខេត្តតាកែវ ប្រព្រឹត្តទៅដោយរលូន មានរបៀបរៀបរយ និងត្រឹមត្រូវតាមនីតិវិធី។
ការប្រជុំនេះក៏បង្ហាញពីការយកចិត្តទុកដាក់របស់ថ្នាក់ដឹកនាំកងរាជអាវុធហត្ថខេត្តតាកែវ ចំពោះការងារគ្រប់គ្រងកម្លាំង និងការរៀបចំរបបសោធននិវត្តន៍របស់មន្ត្រី ដើម្បីឱ្យការអនុវត្តការងាររដ្ឋបាល និងការងារកម្លាំងកាន់តែមានប្រសិទ្ធភាព និងស្របតាមបទប្បញ្ញត្តិ៕
