ខេត្តតាកែវ៖ រដ្ឋបាលខេត្តតាកែវ បន្តជំរុញការអនុវត្តកម្មវិធីប្រយុទ្ធនឹងជំងឺអេដស៍ប្រកបដោយប្រសិទ្ធភាព ខណៈគិតត្រឹមត្រីមាសទី២ ឆ្នាំ២០២៦ មានអ្នកផ្ទុកមេរោគអេដស៍កំពុងទទួលការព្យាបាលដោយឱសថប្រឆាំងមេរោគ (ARV) សរុបចំនួន ២,៩៧៤នាក់ ហើយការអនុវត្តគោលដៅអន្តរជាតិ ៩៥-៩៥-៩៥ សម្រេចបានក្នុងកម្រិតខ្ពស់។
ព្រឹកថ្ងៃទី៣១ ខែកក្កដា ឆ្នាំ២០២៦ លោកស្រី ឡុង បូណារេត អភិបាលរងខេត្តតាកែវ និងជាអនុប្រធានគណៈកម្មាធិការប្រយុទ្ធនឹងជំងឺអេដស៍ខេត្ត តំណាងដ៏ខ្ពង់ខ្ពស់ លោក វ៉ី សំណាង អភិបាល នៃគណៈអភិបាលខេត្តតាកែវ និងជាប្រធានគណៈកម្មាធិការប្រយុទ្ធនឹងជំងឺអេដស៍ខេត្ត បានអញ្ជើញជាអធិបតីក្នុងកិច្ចប្រជុំត្រួតពិនិត្យរបាយការណ៍វឌ្ឍនភាពប្រចាំត្រីមាសទី២ ឆ្នាំ២០២៦ របស់គណៈកម្មាធិការប្រយុទ្ធនឹងជំងឺអេដស៍ខេត្ត។
កិច្ចប្រជុំនេះបានប្រព្រឹត្តទៅនៅសាលប្រជុំមន្ទីរសុខាភិបាលខេត្តតាកែវ ដោយមានការចូលរួមពីថ្នាក់ដឹកនាំ មន្ត្រីជំនាញ និងភាគីពាក់ព័ន្ធ ដើម្បីពិនិត្យវាយតម្លៃលទ្ធផលការងារ ពិភាក្សាអំពីបញ្ហាប្រឈម និងដាក់ចេញនូវទិសដៅបន្ត សំដៅសម្រេចឱ្យបាននូវគោលដៅលុបបំបាត់ការឆ្លងជំងឺអេដស៍ជាបញ្ហាសុខភាពសាធារណៈ។
លោកឱសថការី ផាន់ វ៉ាន់ ប្រធានមន្ទីរសុខាភិបាលខេត្តតាកែវ បានឱ្យដឹងថា គិតត្រឹមត្រីមាសទី២ ឆ្នាំ២០២៦ ខេត្តមានអ្នកទទួលការព្យាបាលដោយឱសថប្រឆាំងមេរោគអេដស៍ (ARV) សរុប ២,៩៧៤នាក់ ក្នុងនោះស្ត្រី ១,៥៤៥នាក់ និងកុមារ ៤៣នាក់ ដែលក្នុងចំណោមនោះមានកុមារី ២៣នាក់។
លោកបន្តថា ការអនុវត្តគោលដៅ ៩៥-៩៥-៩៥ របស់ខេត្ត សម្រេចបានលទ្ធផលល្អប្រសើរ ដោយគោលដៅទី១ (អ្នកផ្ទុកមេរោគដឹងពីស្ថានភាពរបស់ខ្លួន) សម្រេចបាន ៩៣,៥៨%, គោលដៅទី២ (អ្នកដឹងពីស្ថានភាពទទួលការព្យាបាល) សម្រេចបាន ១០០% និងគោលដៅទី៣ (អ្នកទទួលការព្យាបាលមានកម្រិតមេរោគត្រូវបានបង្ក្រាប) សម្រេចបាន ៩៨,១៧%។
លទ្ធផលនេះបានឆ្លុះបញ្ចាំងពីកិច្ចខិតខំប្រឹងប្រែងរួមរបស់រដ្ឋបាលខេត្ត មន្ទីរសុខាភិបាល និងដៃគូពាក់ព័ន្ធ ក្នុងការពង្រឹងសេវាបង្ការ ធ្វើតេស្ត រកឃើញអ្នកផ្ទុកមេរោគឱ្យបានឆាប់រហ័ស និងផ្តល់ការព្យាបាលប្រកបដោយប្រសិទ្ធភាព ដើម្បីលើកកម្ពស់គុណភាពជីវិតរបស់អ្នកផ្ទុកមេរោគអេដស៍ និងកាត់បន្ថយការចម្លងទៅកាន់អ្នកដទៃ៕
