ខេត្តតាកែវ៖ នាព្រឹកថ្ងៃទី១៦ ខែកក្កដា ឆ្នាំ២០២៦ លោក សាយ វណ្ណៈ អភិបាលស្រុកបាទី បានដឹកនាំមន្ត្រីជំនាញ និងអាជ្ញាធរមូលដ្ឋាន ចុះពិនិត្យស្ថានភាពជាក់ស្តែងនៅអាហារដ្ឋាន «បុប្ផាលាក់ខ្លួន» ស្ថិតក្នុងភូមិត្រាំត្បាល ឃុំក្រាំងលាវ ក្រោយទទួលបានសេចក្តីរាយការណ៍ជុំវិញការសាងសង់សំណង់ និងចាក់ដីរំលោភលើខ្នងប្រឡាយទឹកសាធារណៈ។
ក្នុងឱកាសចុះពិនិត្យនោះ លោកអភិបាលស្រុកបានណែនាំយ៉ាងម៉ឺងម៉ាត់ដល់អាជ្ញាធរឃុំក្រាំងលាវ និងមន្ត្រីជំនាញ ត្រូវសហការជាមួយម្ចាស់អាជីវកម្មដើម្បី៖
កាយដី និងរំលាយសំណង់ដែលរំលោភបំពានលើខ្នងប្រឡាយចេញជាបន្ទាន់។
ស្តារប្រឡាយទឹកឱ្យវិលត្រឡប់ទៅរកស្ថានភាពដើមវិញ ដើម្បីធានាចរន្តទឹកហូរបានសម្រួល។
បង្ការគ្រោះទឹកជំនន់ដែលអាចកើតមានឡើងក្នុងរដូវវស្សា និងរក្សាប្រភពទឹកសម្រាប់ប្រជាពលរដ្ឋប្រើប្រាស់ជាទូទៅ។
ទន្ទឹមនឹងការអនុវត្តច្បាប់យ៉ាងតឹងរ៉ឹង អាជ្ញាធរស្រុកបាទីក៏បានបង្ហាញនូវការយោគយល់ និងគាំទ្រដល់សកម្មភាពសេដ្ឋកិច្ចក្នុងស្រុកផងដែរ។ លោក សាយ វណ្ណៈ បានលើកទឹកចិត្តដល់ម្ចាស់អាហារដ្ឋាន «បុប្ផាលាក់ខ្លួន» ឱ្យបន្តដំណើរការអាជីវកម្មរបស់ខ្លួនទៅមុខទៀត ប៉ុន្តែត្រូវ៖
១, ជៀសវាងដាច់ខាតការសាងសង់សំណង់រឹងមាំ ឬចាក់ដីបិទប្រភពទឹកសាធារណៈជាថ្មី។
២, ទទួលភ្ញៀវដោយភាពរាក់ទាក់ ស្និទ្ធស្នាល និងស្នាមញញឹម ដើម្បីទាក់ទាញភ្ញៀវទេសចរជាតិ និងអន្តរជាតិ។
៣, យកចិត្តទុកដាក់លើការរៀបចំកែលម្អសោភ័ណភាព បរិស្ថានជុំវិញ និងអនាម័យចំណីអាហារស្របតាមស្តង់ដារក្រសួងសុខាភិបាល។
“ការអភិវឌ្ឍអាជីវកម្មត្រូវតែដើរទន្ទឹមគ្នានឹងការគោរពផលប្រយោជន៍សាធារណៈ។ ការរក្សាតុល្យភាពនេះ មិនត្រឹមតែជួយឱ្យអាជីវកម្មមានចីរភាពប៉ុណ្ណោះទេ ប៉ុន្តែថែមទាំងជួយលើកកម្ពស់មុខមាត់វិស័យទេសចរណ៍នៅក្នុងមូលដ្ឋានទាំងមូលផងដែរ។”
សកម្មភាពចុះអន្តរាគមន៍ប្រកបដោយភាពទន់ភ្លន់តែម៉ឺងម៉ាត់នេះ ទទួលបានការគាំទ្រយ៉ាងខ្លាំងពីសំណាក់ប្រជាពលរដ្ឋក្នុងតំបន់ ដែលបង្ហាញពីការយកចិត្តទុកដាក់ខ្ពស់របស់រដ្ឋបាលស្រុកបាទី ក្នុងការការពារទ្រព្យសម្បត្តិរដ្ឋ ផលប្រយោជន៍រួម និងការជំរុញសេដ្ឋកិច្ចសហគមន៍ប្រកបដោយសមធម៌ និងចីរភាព៕
