ខេត្តកណ្តាល៖ ប្រជាពលរដ្ឋបានលើកឡើងនូវក្តីបារម្ភ ក្រោយសង្កេតឃើញសំណង់មួយកន្លែង សង្ស័យមិនទាន់មានលិខិតអនុញ្ញាតសាងសង់ត្រឹមត្រូវ ស្ថិតនៅជាប់ផ្លូវបេតុង ក្នុងភូមិចិនកោះ ឃុំគគីរ ស្រុកកៀនស្វាយ ខេត្តកណ្តាល ខណៈក្រុមជាងនៅតែបន្តការសាងសង់យ៉ាងសកម្ម។
ជាក់ស្តែង នៅព្រឹកថ្ងៃទី១ ខែកក្កដា ឆ្នាំ២០២៦ គេសង្កេតឃើញកម្មករកំពុងសម្រុកសាងសង់ជាបន្តបន្ទាប់ ដោយមិនទាន់ឃើញមានការចុះត្រួតពិនិត្យ ឬវិធានការពីអាជ្ញាធរមានសមត្ថកិច្ចនៅឡើយ ដែលបង្កឱ្យមហាជនមានចម្ងល់ថា តើសំណង់នេះមានលិខិតអនុញ្ញាតត្រឹមត្រូវដែរឬទេ?
ការអនុវត្តច្បាប់ស្តីពីសំណង់ គួរតែធ្វើដោយស្មើភាព និងមានប្រសិទ្ធភាពចំពោះគ្រប់ភាគី ដើម្បីបញ្ចៀសការរិះគន់ថា «សំណង់ហោះមុនច្បាប់» ឬការអនុវត្តច្បាប់មិនស្មើគ្នា ដែលអាចប៉ះពាល់ដល់ទំនុកចិត្តរបស់ប្រជាពលរដ្ឋលើការគ្រប់គ្រងរដ្ឋបាលមូលដ្ឋាន។
ជុំវិញករណីកាលដ្ឋានសំណង់គ្មានច្បាប់ខាងលើនេះ លោកឡូវ សុខសាន្ត អភិបាលស្រុកកៀនស្វាយបានបញ្ជាក់ប្រាប់អ្នកសារព័ត៌មានថា សំណង់ខាងលើគ្មានច្បាប់នោះទេ រដ្ឋបាលស្រុកនិងចេញស.ជ.ណ ឱ្យគាត់ផ្អាកនិងទៅសុំច្បាប់ឱ្យបានត្រឹមត្រូវ៕
