ខេត្តកណ្ដាល៖ ប្រជាពលរដ្ឋ និងអ្នកធ្វើដំណើរជាច្រើនបានសម្ដែងការកោតសរសើរចំពោះលោក ពៅ គឹមលី អភិបាលរងក្រុងតាខ្មៅ ដែលបានបង្ហាញពីការយកចិត្តទុកដាក់ខ្ពស់ក្នុងការរៀបចំសណ្ដាប់ធ្នាប់សាធារណៈ និងសោភ័ណភាពទីក្រុង ដោយនៅរសៀលថ្ងៃទី៩ ខែមិថុនា ឆ្នាំ២០២៦ លោកបានដឹកនាំកម្លាំងអាជ្ញាធរ និងមន្ត្រីពាក់ព័ន្ធចុះអនុវត្តវិធានការរៀបចំសណ្ដាប់ធ្នាប់នៅតំបន់មាត់ទន្លេ ក្រុងតាខ្មៅ ខេត្តកណ្ដាល។
ក្នុងប្រតិបត្តិការនោះ លោក ពៅ គឹមលី បានចុះពិនិត្យដោយផ្ទាល់នៅហាងសាច់អាំងបែបចិនមួយកន្លែង ដែលមានភ្ញៀវយកម៉ូតូចតលើចិញ្ចើមផ្លូវ និងចំណីផ្លូវសាធារណៈ ហើយបានធ្វើការណែនាំយ៉ាងម៉ឺងម៉ាត់ដល់ម្ចាស់អាជីវកម្ម ឱ្យរៀបចំទីតាំងចតយានយន្តឱ្យបានត្រឹមត្រូវ និងមិនត្រូវអនុញ្ញាតឱ្យមានការរំលោភយកចិញ្ចើមផ្លូវសាធារណៈបន្តទៀតឡើយ។
ការចុះអនុវត្តវិធានការនេះ ត្រូវបានមហាជនចាត់ទុកថា ជាសកម្មភាពជាក់ស្តែង និងមានប្រសិទ្ធភាព ព្រោះកន្លងមក រដ្ឋបាលខេត្តកណ្ដាល ក្រោមការដឹកនាំរបស់ឯកឧត្តម គួច ចំរើន អភិបាលខេត្តកណ្ដាល បានចេញសេចក្ដីជូនដំណឹង និងការណែនាំជាបន្តបន្ទាប់រហូតដល់៣លើក ស្ដីពីការហាមឃាត់ការរំលោភយកចិញ្ចើមផ្លូវ ចំណីផ្លូវ និងទីសាធារណៈសម្រាប់ប្រកបអាជីវកម្ម ឬចតយានយន្តដោយគ្មានសណ្ដាប់ធ្នាប់។ ប៉ុន្តែនៅតាមទីតាំងមួយចំនួន បញ្ហានេះនៅតែកើតមាន ដែលទាមទារឱ្យមានការចុះអនុវត្តដោយផ្ទាល់ពីអាជ្ញាធរ។
ប្រជាពលរដ្ឋបានលើកឡើងថា លោក ពៅ គឹមលី ជាមន្ត្រីជាថ្នាក់ដឹកនាំមូលដ្ឋានដែលតែងតែចុះធ្វើការងារផ្ទាល់ មិនគ្រាន់តែចេញសេចក្ដីណែនាំប៉ុណ្ណោះទេ ប៉ុន្តែថែមទាំងចុះពិនិត្យ តាមដាន និងជំរុញឱ្យការអនុវត្តទទួលបានលទ្ធផលជាក់ស្តែងផងដែរ។ សកម្មភាពនេះបានបង្ហាញពីការទទួលខុសត្រូវខ្ពស់ចំពោះផលប្រយោជន៍សាធារណៈ និងការកែលម្អសណ្ដាប់ធ្នាប់ក្នុងក្រុងតាខ្មៅ។
មហាជនជាច្រើនសង្ឃឹមថា ក្រោមការយកចិត្តទុកដាក់ និងការដឹកនាំប្រកបដោយការទទួលខុសត្រូវរបស់លោក ពៅ គឹមលី រួមទាំងការគាំទ្រពីរដ្ឋបាលខេត្តកណ្ដាល បញ្ហាការរំលោភយកចិញ្ចើមផ្លូវ និងទីសាធារណៈនឹងត្រូវបានកាត់បន្ថយជាបន្តបន្ទាប់ ធ្វើឱ្យក្រុងតាខ្មៅកាន់តែមានសណ្ដាប់ធ្នាប់ សោភ័ណភាព និងសមស្របជាទីក្រុងទំនើបដែលកំពុងអភិវឌ្ឍឥតឈប់ឈរ។
ប្រជាពលរដ្ឋក៏បានអំពាវនាវដល់ម្ចាស់អាជីវកម្មទាំងអស់ ឱ្យចូលរួមសហការជាមួយអាជ្ញាធរ ដោយគោរពតាមការណែនាំ និងបទប្បញ្ញត្តិពាក់ព័ន្ធ ដើម្បីរួមគ្នាថែរក្សាសណ្ដាប់ធ្នាប់ សោភ័ណភាព និងបរិស្ថានក្នុងក្រុងតាខ្មៅឱ្យកាន់តែល្អប្រសើរឡើង៕
