ខេត្តកណ្តាល៖ មន្ត្រីនានាខ្សឹបខ្សៀវពាក្យចចាមអារ៉ាម នៅស្រុកលើកដែកនោះថា នៅគ្រាដែលរាជរដ្ឋាភិបាលបើកយុទ្ធនាការគ្រប់ទិសទី បង្ក្រាបបទល្មើសស្គេមអនឡាញ ជាពិសេសនៅពេលដែលកម្លាំងចម្រុះ ចុះបង្ក្រាបបទល្មើសស្គេមអនឡាញនៅស្រុកលើកដែកនោះ លោកចាប ច័ន្ទវិទ្យា អភិបាលស្រុកមិនមានវត្តមានចូលរួមនោះឡើយ។ ប្រភពខ្សឹបខ្សៀវថា ពេលដែលកម្លាំងចម្រុះចុះធ្វើប្រតិបត្តិការបង្ក្រាបទីតាំងស្គេមអនឡាញ នៅស្រុកលើកដែក មិនឃើញវត្តមានលោកចាប ច័ន្ទវិទ្យា ចូលរួមនោះឡើយ។ ប្រភពខ្លះបង្ហើបថា នៅពេលនោះលោកអភិបាលស្រុកកំពុងនៅក្រៅប្រទេស។ គេមិនដឹងថា តើអវត្តមានរបស់លោកអភិបាលស្រុកលើកដែក ដោយ សារមូលហេតុអ្វីនោះឡើយ។ ប្រភពខ្លះបែជានិយាយថា លោកអភិបាលចាកចេញទៅក្រៅប្រទេស ព្រោះមិនចង់មានការពាក់ព័ន្ធដោយប្រការណាមួយ។
គួរបញ្ជាក់ថា កម្លាំងចម្រុះ បើកប្រតិបត្តិការបង្ក្រាបទីតាំង Scam Online ចំនួន២ កន្លែងផ្សេងគ្នា ក្នុងភូមិសាស្ត្រស្រុកលើកដែក ដោយទទួលបានជោគជ័យ កាលពីរសៀលថ្ងៃទី២៦ ខែ ឧសភា ឆ្នាំ២០២៦។ប្រតិបត្តិការនេះ សមត្ថកិច្ចបានឃាត់ខ្លួនជនជាតិចិនចំនួន៣៨នាក់ និងកំពុងបន្តស្រាវជ្រាវពាក់ព័ន្ធបណ្តាញឧក្រិដ្ឋកម្មបច្ចេកវិទ្យាឆ្លងដែនផ្សេងៗទៀត។
ទីតាំងទី១៖ នៅមជ្ឈមណ្ឌលកម្សាន្ត និងផ្ទះសំណាក់ «មីស្ទើ លេង KTV» ក្នុងភូមិព្រែកតូច ឃុំព្រែកដាច់ ស្រុកលើកដែក ខេត្តកណ្ដាល ដែលមានចម្ងាយជាង ១៤០០ម៉ែត្រពីសាលាស្រុកលើកដែកនិង ទីតាំងទី២៖ ស្ថិតនៅក្នុងបរិវេណកីឡដ្ឋាន «មីស្ទើលេង» ក្នុងភូមិព្រែកតូច ឃុំព្រែកដាច់ ស្រុកលើកដែក ដែលមានចម្ងាយប្រមាណជាង ៤៧០០ម៉ែត្រពីសាលាស្រុក លើកដែក និងចម្ងាយប្រមាណជាង១៧០០ម៉ែត្រពីផ្លូវជាតិលេខ១៤។
អវត្តមានរបស់លោកអភិបាលស្រុកនាំឲ្យកម្លាំងជំនាញ ក៏ដូចជាប្រជាពលរដ្ឋមានមន្ទិលសង្ស័ុយ។ លោកចាបច័ន្ទវិទ្យា មិនអាចទាក់ទងដើម្បីសុំការបំភ្លឺបានទេ។ យ៉ាង ណាក៏ដោយគេហទំព័រ យើងខ្ញុំ រង់ចាំការឆ្លើយតបបំភ្លឺលំអិតអំពីព័ត៌មានខាងលើនេះគ្រប់ពេលវេលា ពីលោកអភិបាលស្រុក៕
