ខេត្តកណ្ដាល៖ មហាជនបានលើកជាចម្ងល់ចំពោះសំណង់រឹងមាំមួយកន្លែង ដែលកំពុងដំណើរការសាងសង់លើដីគ្មានប្លង់ និងមានទីតាំងទយទៅដីចំណីទន្លេ ស្ថិតក្នុងភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្ដាល ខណៈសំណង់នេះត្រូវបានអះអាងថា មិនទាន់មានលិខិតអនុញ្ញាតសាងសង់ត្រឹមត្រូវនៅឡើយ។
លោកមេភូមិតាខ្មៅ បានបញ្ជាក់ថា ម្ចាស់សំណង់បានទៅជួបសុំការអនុញ្ញាតពីលោក ជៀម ខូយ ចៅសង្កាត់តាខ្មៅរួចហើយ។ ជុំវិញបញ្ហានេះ លោក ជៀម ខូយ បានឱ្យដឹងថា ដីដែលកំពុងសាងសង់នោះ មិនទាន់មានប្លង់កម្មសិទ្ធិនៅឡើយទេ ហើយលោកក៏បានណែនាំឱ្យម្ចាស់សំណង់ទៅសុំច្បាប់នៅរដ្ឋបាលក្រុងតាខ្មៅ ប៉ុន្តែខាងភូមិបាលក្រុងមិនអាចចេញច្បាប់ឱ្យបាន ដោយសារដីគ្មានប្លង់ស្របច្បាប់។
ប្រភពពីប្រជាពលរដ្ឋបានលើកឡើងថា បើដីគ្មានប្លង់ ហើយក៏គ្មានលិខិតអនុញ្ញាតសាងសង់ និងគ្មានលិខិតបើកការដ្ឋានផងនោះ តើហេតុអ្វីសំណង់រឹងមាំនេះនៅតែអាចដំណើរការសាងសង់បានដោយរលូន ដោយមិនឃើញមានការចុះហាមឃាត់ ឬចាត់វិធានការពីអាជ្ញាធរពាក់ព័ន្ធ។
ប្រភពដដែលបន្តថា តំបន់ជួរមាត់ទន្លេនេះ ត្រូវបានគេបង្ហើបថា រដ្ឋបាលខេត្តកណ្ដាលមានគម្រោងអភិវឌ្ឍជាសួនសាធារណៈនាពេលខាងមុខ ប៉ុន្តែបែរជាមានសំណង់រឹងមាំ២ល្វែង កំពុងសាងសង់ឡើងដោយគ្មានច្បាប់ទៅវិញ ដែលធ្វើឱ្យមហាជនសង្ស័យថា តើច្បាប់គ្មានប្រសិទ្ធភាព ឬអាជ្ញាធរមិនអើពើចំពោះបទល្មើសសំណង់ ហេតុអ្វីមិនយកច្បាប់ធ្វើជាមូលដ្ឋាន ដើម្បីឲ្យមានតម្លាភាពក្នុងសង្គម?
ពាក់ព័ន្ធករណីខាងលើនេះ អ្នកសារព័ត៌មានមិនទាន់អាចសុំការបំភ្លឺពីលោក ឃឹម សំភារ អភិបាលក្រុងតាខ្មៅ បាននៅឡើយទេ ដោយការទំនាក់ទំនងតាមបណ្ដាញតេលេក្រាម ពុំមានអ្នកទទួល៕
