ខេត្តកណ្ដាល៖ លិខិតអនាមិកចំនួន២ច្បាប់ ដែលអះអាងថា ផ្ញើចេញពីក្រុមមន្ត្រីរាជការនៅក្នុងមន្ទីរសាធារណការ និងដឹកជញ្ជូន ខេត្តកណ្តាល បានបែកធ្លាយដល់អ្នកកាសែត នៅព្រឹកថ្ងៃទី៧ ខែឧសភា ឆ្នាំ២០២៦នេះ ដោយទម្លាយការចោទប្រកាន់ធ្ងន់ៗពាក់ព័ន្ធនឹងបក្ខពួកនិយម ការប្រើប្រាស់មន្ត្រីចូលនិវត្តន៍បន្តកាន់កាប់ការងារ និងការតែងតាំងមុខតំណែងដែលអាចផ្ទុយនឹងបទប្បញ្ញត្តិរដ្ឋបាល។
តាមខ្លឹមសារលិខិត ដែលអះអាងថា ចេញពី «មន្ត្រីរាជការដែលមិនអាចស៊ូទ្រាំនឹងភាពមិនប្រក្រតីបានទៀត» បានលើកឡើងថា បុគ្គលឈ្មោះ ជា សារ៉ាន់ ដែលត្រូវបានអះអាងថា ជាមន្ត្រីចូលនិវត្តន៍ នៅតែបន្តមានឥទ្ធិពលលើការគ្រប់គ្រងការដ្ឋានថែទាំផ្លូវជាតិមួយចំនួន រួមមានផ្លូវជាតិលេខ១, ២១, ២១អា, ១១០ និង១៤។
ប្រភពដដែលបានអះអាងថា ការបន្តកាន់កាប់ការងារនេះ ត្រូវបានអនុវត្តតាមរយៈការប្រើប្រាស់គ្រឿងចក្រ និងថវិការដ្ឋ ក្នុងលក្ខណៈដែលពួកគេចាត់ទុកថា «អនាធិបតេយ្យ» ទោះបីជាបុគ្គលខាងលើត្រូវបានអះអាងថា ផុតពីក្របខណ្ឌរដ្ឋរួចហើយក្តី។
ក្រៅពីនេះ លិខិតក៏បានចោទប្រកាន់លើបុគ្គលឈ្មោះ ជ្រា ថាវរិទ្ធ ដែលត្រូវបានអះអាងថា ផ្ទេរមកពីខេត្តព្រះសីហនុ ថាកំពុងប្រើប្រាស់ឥទ្ធិពល និងបណ្ដាញបក្ខពួក ដើម្បីជំរុញការតែងតាំងខ្លួនទៅជាអនុប្រធានមន្ទីរទី៤ នាពេលខាងមុខ។
ប្រភពខាងលើបានលើកឡើងថា ការតែងតាំងបន្ថែមនេះ អាចផ្ទុយនឹងអនុក្រឹត្យលេខ២៦ ដែលកំណត់ឱ្យមន្ទីរប្រភេទ “ក” មានអនុប្រធានត្រឹមតែ៣រូបប៉ុណ្ណោះ។
លិខិតអនាមិកទាំងនោះ ក៏បានអះអាងបន្ថែមថា បុគ្គលទាំងពីររូប បានយកឈ្មោះថ្នាក់ដឹកនាំជាន់ខ្ពស់មកធ្វើជាខ្នងបង្អែក ដើម្បីសម្លុត បំបាក់ស្មារតី និងរុញច្រានមន្ត្រីដែលមានសមត្ថភាព និងអតីតភាពការងារនៅក្នុងមន្ទីរ បង្កឱ្យមានការបាក់ទឹកចិត្ត និងបរិយាកាសអសកម្មនៅក្នុងស្ថាប័ន។
ជាមួយគ្នានេះដែរ លិខិតអនាមិកមួយច្បាប់ទៀត ត្រូវបានគេអះអាងថា បានផ្ញើជូនឯកឧត្តមឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ ដោយស្នើឱ្យមានការចាត់ក្រុមអធិការកិច្ចចុះពិនិត្យស្ថានភាពជាក់ស្តែង ពាក់ព័ន្ធនឹងការបែងចែកភារកិច្ច ការប្រើប្រាស់មន្ត្រីក្រៅក្របខណ្ឌ និងការតែងតាំងមុខតំណែងដែលអាចផ្ទុយនឹងច្បាប់រដ្ឋបាល។
លិខិតនោះបានព្រមានថា ការបន្តឱ្យមន្ត្រីចូលនិវត្តន៍កាន់កាប់ការងារស្នូល និងការក្តោបក្តាប់ការងារច្រើនផ្នែកដោយមន្ត្រីមួយចំនួន អាចប៉ះពាល់ដល់គោលការណ៍តម្លាភាព ប្រសិទ្ធភាពការងារ និងឱកាសរីកចម្រើនរបស់មន្ត្រីជំនាន់ក្រោយ។
យ៉ាងណាក៏ដោយ លោកបូរី វង្សានិតមន្ទីរសាធារណការ និងដឹកជញ្ជូន ខេត្តកណ្តាល មិនទាន់ស្រាយបំភ្លឺអោយបានច្បាស់លាស់នៅឡើយទេ ដោយលោកបានឆ្លើយតបមកកាន់បណ្ដាញសារព័ត៌មានពេញចិត្តមេឌា នៅថ្ងៃ ទី០៧ ខែឧសភា ឆ្នាំ២០២៦ តាមបណ្ដាញទំនាក់ទំនងតេលេក្រាមថាទាក់ទងនឹងរឿងខាងលើនេះ”ខ្ញុំកំពុងធ្វើការជាមួយនិងខាងក្រសួង ដើម្បីស្រាវជ្រាវ”
រីឯបុគ្គលដែលត្រូវបានលើកឈ្មោះនៅក្នុងលិខិត មិនទាន់មានការបកស្រាយ ឬចេញប្រតិកម្មផ្លូវការណាមួយនៅឡើយទេ ដោយបណ្ដាញសារព័ត៌មានពេញចិត្តមេឌាពុំមានលេខទំនាក់ទំនង។
បណ្ដាញសារព័ត៌មានពេញចិត្តមេឌា នឹងបន្តរង់ចាំការស្រាយបំភ្លឺពីគ្រប់ភាគីពាក់ព័ន្ធ ដើម្បីធានាគោលការណ៍ព័ត៌មានតុល្យភាព វិជ្ជាជីវៈ និងតម្លាភាពក្នុងការផ្សព្វផ្សាយព័ត៌មាន៕
