ខេត្តកណ្តាល៖ នៅរសៀលថ្ងៃទី៦ ខែឧសភា ឆ្នាំ២០២៦នេះ មានការសង្កេតឃើញថា រថយន្តយីឌុបជាច្រើនគ្រឿងបានសម្រុកដឹកថ្មពុកយ៉ាងពោពាសលើផ្លូវក្រវ៉ាត់ក្រុងទី៣ តាមបណ្ដោយមហាវិថីស៊ីជីនពីង បង្កឲ្យមានការព្រួយបារម្ភពីសំណាក់ប្រជាពលរដ្ឋអំពីសុវត្ថិភាពចរាចរណ៍ និងគុណភាពផ្លូវក្នុងរយៈពេលវែង។
ប្រជាពលរដ្ឋមួយចំនួនបានលើកឡើងថា រថយន្តខ្លះមានសញ្ញាសង្ស័យថាដឹកលើសទម្ងន់ ដែលអាចប៉ះពាល់ដល់សំណង់ផ្លូវ និងបង្កហានិភ័យក្នុងការធ្វើដំណើររបស់អ្នកប្រើប្រាស់ផ្លូវផ្សេងទៀត។ ជាមួយគ្នានេះ សំណួរមួយត្រូវបានដាក់ឡើងថា តើរថយន្តទាំងនេះបានឆ្លងកាត់ការត្រួតពិនិត្យទម្ងន់នៅស្ថានីយ៍អចល័តណាមួយឬយ៉ាងដូចម្តេច ហើយតើមានការគេចវេសពីការត្រួតពិនិត្យដែរឬទេ?
យោងតាមការកត់សម្គាល់នៅទីតាំង បានឃើញរថយន្តមួយចំនួនដែលពាក់ស្លាកលេខ ភ្នំពេញ 3A-6217, ភ្នំពេញ 3E-8300 ,ភ្នំពេញ 3F-5562 និង តាកែវ 4A-0001 កំពុងដឹកជញ្ជូនសម្ភារៈខាងលើឆ្លងកាត់ដីរាជធានូភ្នំពេញ និងខេត្តកណ្ដាល។ ទោះជាយ៉ាងណា ករណីនេះត្រូវការការត្រួតពិនិត្យបន្ថែមពីសមត្ថកិច្ចជំនាញ ដើម្បីបញ្ជាក់ពីភាពត្រឹមត្រូវនៃការដឹកជញ្ជូន។
ប្រជាពលរដ្ឋបានអំពាវនាវដល់ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ព្រមទាំងលោក សេង ឈួន និងលោក បូរី វង្សសានិត្យ ដែលពាក់ព័ន្ធ ជួយពង្រឹងវិធានការត្រួតពិនិត្យការដឹកជញ្ជូនលើសទម្ងន់ និងការគេចវេសស្ថានីយ៍ត្រួតពិនិត្យ ដើម្បីការពារសំណង់ផ្លូវជាតិ និងមហាវិថីឲ្យមានអាយុកាលប្រើប្រាស់យូរអង្វែង និងធានាសុវត្ថិភាពសាធារណៈ។
ការអនុវត្តច្បាប់យ៉ាងតឹងរឹង និងមានប្រសិទ្ធភាព មិនត្រឹមតែជួយថែរក្សាអភិវឌ្ឍន៍ហេដ្ឋារចនាសម្ព័ន្ធទេ ប៉ុន្តែថែមទាំងបង្កើនទំនុកចិត្តរបស់ប្រជាពលរដ្ឋលើការគ្រប់គ្រង និងអនុវត្តន៍នីតិវិធីរបស់អាជ្ញាធរផងដែរ៕
