ខេត្តតាកែវ៖ ព្រឹកថ្ងៃទី២២ ខែមេសា ឆ្នាំ២០២៦ លោក អ៊ំ ចំរើន អភិបាលនៃគណៈអភិបាលស្រុកទ្រាំង លោកអភិបាលរងស្រុក រួមជាមួយក្រុមការងារ និងអាជ្ញាធរភូមិ-ឃុំ បានអញ្ជើញចុះទៅប្រគល់ផ្ទះថ្មីមួយខ្នង ជូនដល់គ្រួសារក្រីក្រ និងជាគ្រួសាររងគ្រោះដោយសារការជួញដូរ ស្ថិតនៅភូមិសូភី ឃុំរនាម ស្រុកទ្រាំង ខេត្តតាកែវ។
ការប្រគល់ផ្ទះនេះ គឺជាសកម្មភាពមួយដែលបង្ហាញពីការយកចិត្តទុកដាក់យ៉ាងខ្ពស់របស់អាជ្ញាធរមូលដ្ឋាន ក្នុងការលើកកម្ពស់ជីវភាពរស់នៅរបស់ប្រជាពលរដ្ឋដែលកំពុងប្រឈមមុខនឹងភាពលំបាក និងជួយស្តារឡើងវិញនូវសុវត្ថិភាពសង្គម សម្រាប់គ្រួសារដែលរងផលប៉ះពាល់ពីបញ្ហាសង្គមផ្សេងៗ។
ផ្ទះដែលត្រូវបានប្រគល់ជូននេះ ត្រូវបានសាងសង់ឡើងដោយមានការគាំទ្រពីអង្គការដៃគូ គឺអង្គការសម្ព័ន្ធចាប់ដៃ ដែលបានចូលរួមយ៉ាងសកម្មក្នុងការផ្តល់ជំនួយសង្គម និងការពារសិទ្ធិមនុស្ស ជាពិសេសការជួយដល់ជនរងគ្រោះដោយសារការជួញដូរ។ មិនត្រឹមតែផ្ទះប៉ុណ្ណោះទេ ក្រុមការងារក៏បាននាំយកសម្ភារៈប្រើប្រាស់ចាំបាច់មួយចំនួន ដូចជា អង្ករ មី និងសម្ភារៈប្រើប្រាស់ប្រចាំថ្ងៃ ដើម្បីជួយសម្រួលដល់ជីវភាពគ្រួសារនោះផងដែរ។
ក្នុងឱកាសនោះ លោកអភិបាលស្រុកបានលើកឡើងថា ការជួយឧបត្ថម្ភនេះ មិនត្រឹមតែជាការផ្តល់ជំនួយផ្នែកសម្ភារៈប៉ុណ្ណោះទេ ប៉ុន្តែជាការផ្តល់កម្លាំងចិត្ត និងសេចក្តីសង្ឃឹមថ្មីដល់គ្រួសារដែលកំពុងជួបការលំបាក ឲ្យអាចឈរជើងឡើងវិញ និងបន្តជីវិតដោយមានកិត្តិយស និងសុវត្ថិភាពក្នុងសង្គម។
សកម្មភាពនេះក៏បញ្ជាក់ឲ្យឃើញពីសហការល្អរវាងអាជ្ញាធរមូលដ្ឋាន និងអង្គការដៃគូ ក្នុងការចូលរួមដោះស្រាយបញ្ហាសង្គម និងកាត់បន្ថយភាពក្រីក្រ នៅតាមតំបន់ជនបទ។ ជាពិសេស គឺជាការចូលរួមក្នុងការការពារ និងគាំទ្រជនរងគ្រោះ ដើម្បីឲ្យពួកគេមានឱកាសរស់នៅល្អប្រសើរឡើង និងរួមចំណែកក្នុងការអភិវឌ្ឍសង្គមជាតិឲ្យកាន់តែរឹងមាំ៕
