ខេត្តកណ្ដាល៖ មន្ទីរអភិវឌ្ឍន៍ជនបទខេត្តកណ្ដាលបាននិងកំពុងអនុវត្តគម្រោងស្ថាបនាផ្លូវចាក់បេតុងថ្មីមួយខ្សែមានប្រវែងសរុប៤,៤០២ ម៉ែត្រ ទទឹង៩ម៉ែត្រដើម្បីបង្កើនភាពងាយស្រួលក្នុងការធ្វើដំណើរ និងការដឹកជញ្ជូនរបស់ប្រជាពលរដ្ឋនៅក្នុងតំបន់។ ផ្លូវបេតុងនេះ តភ្ជាប់ចាប់ពី ឃុំបាគូ ចំណុចមុខសាលាស្រុកកណ្ដាលស្ទឹង ឆ្លងកាត់ឃុំគោកត្រប់ និងភ្ជាប់ទៅកាន់ឃុំសៀមរាប ត្រង់ចំណុច ផ្លូវជាតិលេខ២។
ជាក់ស្ដែង នៅរសៀលថ្ងៃទី១១ ខែមីនា ឆ្នាំ២០២៦នេះ លោកស្រី ជី ថាវី ប្រធានមន្ទីរអភិវឌ្ឍន៍ជនបទខេត្តកណ្ដាលបានដឹកនាំមន្ត្រីជំនាញចុះពិនិត្យវឌ្ឍនភាពនៃការស្ថាបនាផ្លូវខាងលើនេះដោយផ្ទាល់។
ក្នុងឱកាសនោះ លោកស្រីបានបញ្ជាក់ថា ការស្ថាបនាផ្លូវនេះ ត្រូវបានអនុវត្តទៅតាមបទដ្ឋានបច្ចេកទេស និងគំនូសប្លង់ដែលបានកំណត់យ៉ាងត្រឹមត្រូវ ដើម្បីធានាគុណភាព និងភាពរឹងមាំប្រើប្រាស់បានយូរអង្វែង។ លោកស្រីក៏បានណែនាំឲ្យក្រុមការងារបច្ចេកទេស និងក្រុមហ៊ុនសាងសង់ឲ្យបន្តយកចិត្តទុកដាក់ខ្ពស់លើគុណភាពការងារ និងពន្លឿនដំណើរការសាងសង់ឲ្យបានទាន់តាមផែនការដែលបានកំណត់។
តាមផែនការ ការដ្ឋានស្ថាបនាផ្លូវនេះ គ្រោងនឹងបញ្ចប់នៅ ចុងខែឧសភា ឆ្នាំ២០២៦ ខាងមុខនេះ។
ទន្ទឹមនោះ ប្រជាពលរដ្ឋដែលរស់នៅតាមបណ្តោយផ្លូវបេតុងថ្មីបានសម្តែងការរីករាយ និងសាទរយ៉ាងខ្លាំងចំពោះគម្រោងស្ថាបនាផ្លូវបេតុងនេះ ព្រោះវានឹងជួយសម្រួលដល់ការធ្វើដំណើរ ការដឹកជញ្ជូនកសិផល និងជួយលើកកម្ពស់សេដ្ឋកិច្ចនៅក្នុងសហគមន៍ឲ្យកាន់តែប្រសើរឡើង៕
