ខេត្តកំពង់ស្ពឺ៖ ប្រជាពលរដ្ឋជាច្រើនគ្រួសារនៅ ភូមិត្រពាំងរុន ឃុំដំណាក់រាំង ស្រុកសាមគ្គីមុនីជ័យ ខេត្តកំពង់ស្ពឺ កំពុងប្រឈមនឹងបញ្ហាសុខភាពជាមួយនឹងការសម្តែងក្តីព្រួយបារម្ភ និងបានអំពាវនាវដល់អាជ្ញាធរពាក់ ព័ន្ធឲ្យចុះអន្តរាគមន៍ជាបន្ទាន់ លើករណីសិប្បកម្មកែច្នៃស្លប្រេងម៉ាស៊ីន១កន្លែង ដែលត្រូវបានគេរាយការណ៍ថាបាន បង្កផលប៉ះពាល់យ៉ាងធ្ងន់ធ្ងរដល់បរិស្ថាន ដីស្រែ និងសុខមាលភាពរបស់ពួកគាត់។
អ្នកភូមិដែលរងផលប៉ះពាល់បានឲ្យដឹងថា សិប្បកម្មកែច្នៃស្លប្រេងម៉ាស៊ីននេះបានបញ្ចេញទឹកកខ្វក់មានជាតិប្រេង ពណ៌ខ្មៅ ដែលបានហូរចូលទៅក្នុងដីស្រែរបស់ពួកគាត់ បណ្ដាលឲ្យខូចខាតដំណាំស្រូវ ដែលជាក់ស្ដែងកន្លងមកស្រូវដែលកំពុងលូតលាស់ត្រូវបានរលួយ និងងាប់ ដោយសារជាតិពុលនៅក្នុងទឹកកខ្វក់នោះ ដែលនាំ ឲ្យពួកគាត់បាត់បង់ទិន្នផលទាំងស្រុង។
លើសពីនេះទៅទៀត ទឹកស្អុយនិងក្លិនមិនល្អ ហើយទឹកនៅក្នុងប្រឡាយ និងក្នុងស្រែមានសភាពស្អុយរលួយមានជាតិប្រេងអណ្ដែត និងបង្កជាក្លិនមិនល្អដែលប៉ះ ពាល់ដល់ការរស់នៅប្រចាំថ្ងៃរបស់ប្រជាពលរដ្ឋ។ បញ្ហាដែលកំពុងប្រឈមសព្វថ្ងៃនេះគឺ ទឹកស្អុយ និងក្លិនមិន ល្អ ត្រូវបានគេខ្លាចថាអាចបង្កជាបញ្ហាសុខភាពដល់កុមារ និងមនុស្សចាស់ក្នុងមូលដ្ឋាន។
ប្រជាពលរដ្ឋបានលើកឡើងថា ពួកគាត់បានរាយការណ៍ និងស្នើសុំអន្តរាគមន៍ទៅអាជ្ញាធរមូលដ្ឋានជាច្រើនលើកច្រើនសាររួចមកហើយ ប៉ុន្តែបញ្ហានៅតែបន្តកើតមាន។ ពួកគាត់បានស្នើសុំឲ្យអាជ្ញាធរថ្នាក់ខេត្ត ជាពិសេសមន្ទីរបរិស្ថាននិងមន្ទីរកសិកម្ម ចុះត្រួតពិនិត្យនិងចាត់វិធានមការជាបន្ទាន់ទៅលើសិប្បកម្មនេះ ដើម្បី៖
* បញ្ឈប់សកម្មភាពដែលបង្កការបំពុលភ្លាមៗ។
* តម្រូវឲ្យម្ចាស់សិប្បកម្មទទួលខុសត្រូវ និងដោះស្រាយសំណងចំពោះការខូចខាតស្រូវ និងដីស្រែរបស់ប្រជាពលរដ្ឋ។
លោក ច័ន្ទថេត ថានរ:ប្រធានមន្ទីរបរិស្ថាន ខេត្តកំពង់ស្ពឺ បានឲ្យដឹងតាមរយៈទូរសព្ទថា នៅថ្ងៃស្អែកនឹងមានក្រុម ការងារចុះទៅពិនិត្យហើយ។
ប្រជាពលរដ្ឋនៅជុំវិញតំបន់នោះសង្ឃឹមថា ក្រោយពីមានការចុះផ្សាយ អាជ្ញាធរនិងចាត់តាំងឲ្យ ក្រុមការងារជំនាញចុះត្រួតពិនិត្យទីតាំងខាងលើ ក្នុងពេលឆាប់ៗនេះ ដើម្បីវាយតម្លៃពីផលប៉ះពាល់ជាក់ស្ដែង និងចាត់វិធាន ការតាមផ្លូវច្បាប់។
បច្ចុប្បន្ន ប្រជាពលរដ្ឋកំពុងទន្ទឹងរង់ចាំដំណោះស្រាយប្រកបដោយប្រសិទ្ធភាពពីសំណាក់អាជ្ញាធរមាន សមត្ថកិច្ច ដើម្បីអាចទទួលបានដីស្រែដែលស្អាត និងបរិស្ថានរស់នៅប្រកបដោយផាសុកភាពឡើងវិញ៕
