ខេត្តពោធិ៍សាត់៖ នាព្រឹកថ្ងៃទី២៧ ខែកញ្ញា ឆ្នាំ២០២៦ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានដឹកនាំក្រុមការងារបច្ចេកទេស និងអាជ្ញាធរពាក់ព័ន្ធ ចុះពិនិត្យផ្ទាល់លើសកម្មភាពរៀបចំ ជួសជុលកែលម្អ អនាម័យ បរិស្ថាន និងសោភ័ណភាព នៅតាមគ្រឹះស្ថានសិក្សាចំនួនពីរ រួមមាន៖ សាលាបឋមសិក្សា និងអនុវិទ្យាល័យអូរដេកា ស្ថិតក្នុងភូមិអូរដេកា ឃុំប្រម៉ោយ ស្រុកវាលវែង និង អនុវិទ្យាល័យសម្តេចឪ សម្តេចម៉ែ ស្ថិតក្នុងស្រុកភ្នំក្រវាញ។
ក្នុងដំណើរចុះពិនិត្យនេះ ឯកឧត្តមអភិបាលខេត្ត បានពិនិត្យយ៉ាងល្អិតល្អន់លើស្ថានភាពជាក់ស្តែងជុំវិញបរិវេណសាលា ដោយផ្តោតសំខាន់លើការរៀបចំទីធ្លា ការកែលម្អសណ្តាប់ធ្នាប់ទូទៅ និងការសម្អាតបរិស្ថាន ដើម្បីធានាឱ្យសាលារៀនទាំងពីរមានភាពស្អាតបាត របៀបរៀបរយ និងមានសោភ័ណភាពគួរឱ្យទាក់ទាញ។
ឱកាសនោះដែរ ឯកឧត្តម ខូយ រីដា បានផ្តល់អនុសាសន៍ និងណែនាំដល់អាជ្ញាធរស្រុក រួមទាំងភាគីពាក់ព័ន្ធ នូវចំណុចសំខាន់ៗមួយចំនួន៖
១. ត្រូវបន្តពិនិត្យ និងវាយតម្លៃការងារកែលម្អឱ្យបានទៀងទាត់ ដោយមិនត្រូវទុកចោលក្រោយចប់យុទ្ធនាការនោះទេ។
២. ត្រូវយកចិត្តទុកដាក់ថែទាំសម្ភារៈ បរិក្ខារសិក្សា និងសំណង់អគារផ្សេងៗឱ្យបានល្អ ដើម្បីការពារការខូចខាតមុនអាយុកាល និងធានាការប្រើប្រាស់បានយូរអង្វែង។
៣. ការរក្សាអនាម័យ និងសុវត្ថិភាពក្នុងសាលារៀន ទាមទារឱ្យមានកិច្ចសហការយ៉ាងជិតស្និទ្ធរវាងគណៈគ្រប់គ្រងសាលា លោកគ្រូ-អ្នកគ្រូ សិស្សានុសិស្ស និងអាជ្ញាធរមូលដ្ឋាន។
ឯកឧត្តមបានគូសបញ្ជាក់ថា ការលើកកម្ពស់បរិស្ថាន និងហេដ្ឋារចនាសម្ព័ន្ធសិក្សា គឺជាកត្តាលីករយ៉ាងសំខាន់ក្នុងការបង្កើតបរិយាកាសសិក្សាប្រកបដោយមេត្រីភាព ដែលរួមចំណែកទាក់ទាញចិត្តសិស្សានុសិស្សឱ្យខិតខំរៀនសូត្រ និងបង្កើនប្រសិទ្ធភាពនៃការបង្រៀនរបស់គ្រូបង្រៀនផងដែរ។
សកម្មភាពនេះ បានឆ្លុះបញ្ចាំងយ៉ាងច្បាស់ពីការយកចិត្តទុកដាក់ខ្ពស់របស់រដ្ឋបាលខេត្តពោធិ៍សាត់ ក្នុងការជំរុញការអភិវឌ្ឍវិស័យអប់រំនៅមូលដ្ឋានឱ្យកាន់តែមានគុណភាព ប្រសិទ្ធភាព និងឆ្លើយតបទៅនឹងតម្រូវការជាក់ស្តែងក្នុងការអភិវឌ្ឍធនធានមនុស្សសម្រាប់ខេត្ត និងប្រទេសជាតិទាំងមូល៕
