ខេត្តកណ្តាល៖លោក ហ៊ាង ប៊ុនថា ប្រធានសមាគមព័ត៌មានអនឡាញកម្ពុជា និងជាអគ្គនាយកបណ្ដាញសារព័ត៌មានឌឹមីរ័រញូស៍ រួមជាមួយសហការីទាំងអស់ នៅថ្ងៃទី១៩ ខែមេសា ឆ្នាំ២០២៦នេះ បានចេញសារថ្វាយព្រះពរ ដោយសម្តែងនូវគារវកិច្ចដ៏ខ្ពង់ខ្ពស់បំផុត ចំពោះ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា។
ក្នុងសារដែលពោរពេញដោយស្មារតីស្មោះត្រង់ និងគោរពសក្ការៈ លោក ហ៊ាង ប៊ុនថា បានលើកហត្ថប្រណម្យ បួងសួងដល់គុណបុណ្យព្រះរតនត្រ័យ ព្រះពុទ្ធ ព្រះធម៌ និងព្រះសង្ឃ ព្រមទាំងទេវតារក្សាព្រះមហាស្វេតច្ឆត្រ និងព្រះបារមីនៃអតីតព្រះមហាក្សត្រខ្មែរគ្រប់ព្រះអង្គ ជាពិសេសព្រះបរមរតនកោដ្ឋ សូមជួយប្រោសព្រំជ័យមង្គល និងសិរីសួស្តីគ្រប់ប្រការ ថ្វាយព្រះមហាក្សត្រ។
សារនេះលោកអគ្គនាយកក៏បានបង្ហាញពីក្តីសង្ឃឹមយ៉ាងជ្រាលជ្រៅថា ព្រះអង្គនឹងទទួលបានជោគជ័យក្នុងការវះកាត់ព្យាបាលព្រះរោគ ដែលធ្វើឡើងដោយក្រុមវេជ្ជបណ្ឌិតជំនាញ នៅមន្ទីរពេទ្យរដ្ឋធានីប៉េកាំង សាធារណរដ្ឋប្រជាមានិតចិន និងឆាប់ស្ដារឡើងវិញនូវព្រះរាជសុខភាពដ៏ល្អបរិបូរណ៍។
លោកប្រធាន ហ៊ាង ប៊ុនថា និងក្រុមការងារ បានបន្តលំឱនកាយ វាចារ និងចិត្ត ក្រាបបង្គំទូលថ្វាយព្រះពរ សូមព្រះអង្គមានព្រះរាជសុខភាពមាំមួន ព្រះកាយពលរឹងមាំ និងគង់ប្រថាប់ជាម្លប់ដ៏ត្រជាក់ត្រជុំ សម្រាប់ប្រជារាស្ត្រខ្មែរ ជានិរន្តរ៍។
អត្ថន័យនៃសារនេះ មិនត្រឹមតែជាការបង្ហាញពីសេចក្តីគោរពប៉ុណ្ណោះទេ ប៉ុន្តែថែមទាំងបញ្ជាក់ពីតួនាទីវិជ្ជាជីវៈ និងក្រមសីលធម៌របស់វិស័យសារព័ត៌មាន ក្នុងការរួមចំណែកថែរក្សាតម្លៃជាតិ និងបង្ហាញភាពស្មោះត្រង់ចំពោះស្ថាប័នព្រះមហាក្សត្រ ដែលជាគ្រឹះស្ថាននៃឯកភាព និងស្ថេរភាពរបស់ប្រទេសជាតិ។
សេចក្តីគួរពុំគួរ សូមទ្រង់ព្រះមេត្តាប្រោសទទួលនូវគារវភក្តីភាពដ៏ខ្ពង់ខ្ពស់បំផុតពីទូលព្រះបង្គំទាំងអស់គ្នា៕
