ខេត្តកណ្តាល៖ ករណីរំលោភលើទំនុកចិត្តក្នុងទម្រង់ “ខ្ចីលុយ” យ៉ាងជាប់លាប់ និងមានល្បិចកល ត្រូវបានអធិការដ្ឋាននគរបាលក្រុងតាខ្មៅ បង្ហាញឲ្យឃើញថា ជនសង្ស័យម្នាក់បានប្រើវិធីសាស្ត្រជិតស្និទ្ធ បង្កើតទំនុកចិត្ត មុននឹងធ្វើសកម្មភាពយកប្រាក់ពីជនរងគ្រោះជាបន្តបន្ទាប់ រហូតបង្កការខូចខាតធំធេង។
ហេតុការណ៍នេះ បានកើតឡើងកាលពីថ្ងៃទី២១ ខែមករា ឆ្នាំ២០២៦ វេលាម៉ោងប្រហែល២២៖៣០នាទី នៅចំណុចភូមិព្រែកឬស្សីលិច សង្កាត់ព្រែកឬស្សី ក្រុងតាខ្មៅ ខេត្តកណ្តាល។
សមត្ថកិច្ចបានឲ្យដឹងថា ជនរងគ្រោះមានចំនួន២នាក់ រួមមាន៖ បុរសម្នាក់ជាមន្ត្រីនគរបាលបាត់បង់ប្រាក់ជិត១ម៉ឺនដុល្លារ និងស្ត្រីម្នាក់ជាអាជីវករបាត់បង់ប្រាក់ចំនួន២៣៨៥ដុល្លារ បន្ទាប់ពីជឿទុកចិត្តលើជនសង្ស័យ។
ជនសង្ស័យឈ្មោះ យិន សុភ័ណ្ឌ ភេទស្រី អាយុ៣៨ឆ្នាំ មុខរបរលក់ដូរ ត្រូវបានឃាត់ខ្លួន បន្ទាប់ពីត្រូវជនរងគ្រោះប្រទះឃើញ និងប្រគល់ឲ្យសមត្ថកិច្ចនៅថ្ងៃទី១៦ ខែមីនា ឆ្នាំ២០២៦ នៅក្នុងហាង K05 ក្រុងតាខ្មៅ។
តាមការស្រាវជ្រាវបានបង្ហាញថា ជនសង្ស័យបានចាប់ផ្តើមស្និទ្ធស្នាលជាមួយជនរងគ្រោះ ដោយអះអាងចង់ទិញផ្ទះ និងដីធ្លី បន្ទាប់មកបានសុំខ្ចីលុយជាបន្តបន្ទាប់ ដោយយកហេតុផលផ្សេងៗ ដូចជា បញ្ហាកុងធនាគារ រថយន្តខូច និងចំណាយផ្សេងៗ។ មិនត្រឹមតែប៉ុណ្ណោះ ក៏មានការយកគ្រឿងអលង្ការដោយមិនទូទាត់ប្រាក់ និងប្រើល្បិចឆ្លៀតឱកាសយកលុយពីកាបូបជនរងគ្រោះផងដែរ។
បន្ថែមពីនេះ ជនសង្ស័យក៏បានបន្តទាក់ទងតាមបណ្តាញសង្គម ដើម្បីសុំផ្ទេរប្រាក់ជាបន្តបន្ទាប់ រហូតសរុបចំនួនជិត១ម៉ឺនដុល្លារ និងយកគ្រឿងអលង្ការបន្ថែម។
នៅចំពោះមុខសមត្ថកិច្ច ជនសង្ស័យបានសារភាពថា ខ្លួនពិតជាបានធ្វើសកម្មភាពសុំខ្ចីលុយពីជនរងគ្រោះទាំងពីរនាក់ពិតប្រាកដមែន។
បច្ចុប្បន្ន ជនសង្ស័យត្រូវបានឃាត់ខ្លួនបណ្តោះអាសន្ន នៅអធិការដ្ឋាននគរបាលក្រុងតាខ្មៅ ដើម្បីចាត់ការតាមនីតិវិធីច្បាប់។
សមត្ថកិច្ចក៏បានអំពាវនាវដល់ប្រជាពលរដ្ឋ ត្រូវមានការប្រុងប្រយ័ត្នខ្ពស់ ចំពោះការខ្ចីប្រាក់ ឬការប្រាស្រ័យទាក់ទងហិរញ្ញវត្ថុ ជាពិសេសជាមួយមនុស្សដែលទើបស្គាល់ថ្មី ដើម្បីជៀសវាងការខូចខាតទ្រព្យសម្បត្តិដូចករណីខាងលើ៕
