ខេត្តកំពង់ចាម៖ ឯកឧត្តម អ៊ុន ចាន់ដា អភិបាលខេត្តកំពង់ចាម និងជាសមាជិកអចិន្ត្រៃយ៍ នៃគណៈកម្មាធិការសហភាពសហព័ន្ធយុវជនកម្ពុជាខេត្ត បានលើកឡើងថា ស.ស.យ.ក ជាតួអង្គមួយដ៏សំខាន់ ក្នុងការអភិវឌ្ឍនូវសមិទ្ធផលជាច្រើន ដែលខេត្តកំពង់ចាមសម្រេចបានកន្លងទៅ។
ឯកឧត្តម អ៊ុន ចាន់ដា បានលើកឡើងដូច្នេះ នារសៀលថ្ងៃទី១៩ ខែកុម្ភៈ ឆ្នាំ២០២៦ ក្នុងកិច្ចប្រជុំបូកសរុបលទ្ធផលការងាររបស់គណៈកម្មាធិការសហភាពសហព័ន្ធយុវជនកម្ពុជាខេត្តកំពង់ចាម ប្រចាំឆ្នាំ២០២៥ និងលើកទិសដៅភារកិច្ចឆ្នាំ២០២៦ នៅស្នាក់ការ ស.ស.យ.ក ខេត្តកំពង់ចាម។
ឯកឧត្តម អភិបាលខេត្តបានថ្លែងថា កិច្ចប្រជុំនេះក៏ត្រូវបានប្រព្រឹត្តទៅក្នុងបរិយាកាសដ៏វិសេសវិសាល ដែលខេត្តកំពង់ចាម សម្រេចបាននូវសមិទ្ធផលជាច្រើនជូនដល់ប្រជាពលរដ្ឋ នៅក្នុងឆ្នាំ២០២៥កន្លងទៅ រួមមាន វឌ្ឍនភាពខាងវិស័យសេដ្ឋកិច្ច សង្គមកិច្ច និងបរិស្ថាន។ ផ្លូវ ថ្នល់ ស្ពាន សាលារៀន មណ្ឌលសុខភាព វត្តអារាម វិហារសាសនា និងហេដ្ឋរចនាសម្ព័ន្ធសាធារណៈនានា ត្រូវបានកសាងឡើងដើម្បីបំពេញតម្រូវការ នៃការផ្តល់សេវាជូនប្រជាពលរដ្ឋ។
ឯកឧត្តម អភិបាលខេត្តបានបន្តថា ការកែលម្អ និងអភិវឌ្ឍតំបន់រមណីយដ្ឋានទេសចរណ៍ត្រូវបានយកចិត្តទុកដាក់លើសពេលណាៗទាំងអស់ ហើយហេដ្ឋារចនាសម្ព័ន្ធ និងយន្តការ នៃការលើកកម្ពស់វិស័យបរិស្ថាន និងអនាម័យ ជាពិសេសទីលានចាក់សំរាមស្ដង់ដាត្រូវបានកសាងឡើង។ ការផ្តល់សេវាសង្គមជូនដល់ប្រជាពលរដ្ឋ បានទទួលនូវការសាទរកាន់តែខ្លាំងពីសំណាក់ប្រជាពលរដ្ឋ។អំពីការលើកកម្ពស់វិស័យសេដ្ឋកិច្ច ចំណូលថវិកាសរុបក្នុងខេត្តកំពង់ចាមឆ្នាំ២០២៥ កន្លងទៅសម្រេចបានប្រមាណ២.៨ពាន់លានដុល្លារអាមេរិក ហើយចំណូលប្រចាំឆ្នាំរបស់ប្រជាពលរដ្ឋម្នាក់ៗ បានកើនឡើងដល់រង្វង់២,៣០០ដុល្លារអាមេរិក ដែលកាលពីឆ្នាំ២០២៤ ចំណូលថវិកាសរុបក្នុងខេត្តមានតែប្រមាណ ២ពាន់លានដុល្លារ និងចំណូលប្រចាំរបស់ប្រជាពលរដ្ឋម្នាក់ៗមានតែប្រមាណ២,២០០ដុល្លារអាមេរិកប៉ុណ្ណោះ។
ឯកឧត្តម អ៊ុន ចាន់ដា បានបញ្ជាក់ថា បើទោះបីជា សមិទ្ធផល និងជោគជ័យទាំងនេះ សម្រេចបានដោយសារការខិតខំប្រឹងប្រែងក្នុងការអនុវត្តការងាររបស់រដ្ឋបាលខេត្ត ក្រុង ស្រុក ឃុំ សង្កាត់ក៏ដោយ ក៏លោកជឿជាក់ថា អង្គភាព ស.ស.យ.ក ក៏ជាតួអង្គមួយដ៏សំខាន់ដែរ ក្នុងការកសាងនូវវឌ្ឍនភាពទាំងនេះ៕
